सोलापूर : सोलापुरात मराठा समाजाच्या बैठकीत हाणामारी झाल्याची घटना घडली आहे. बैठकीतील कार्यकर्त्यांच्या हाणामारीचा व्हिडिओ समोर आला आहे. जन्मजयराजे भोसले यांच्या विरोधात वक्तव्य केल्याने हाणामारी झाल्याची प्राथमिक माहिती मिळत आहे. हाणामारीच्या घटनेनंतर परिसरात एकच खळबळ उडाली.
सोलापूरच्या अक्कलकोटध्ये शिवधर्म फाऊंडेशनच्या कार्यकर्त्यांनी संभाजी ब्रिगेडच्या प्रवीण गायकवाड यांना काळं फासलं होतं. या घटनेने सोलापुरातील राजकीय वातवरण तापलं आहे.
प्रवीण गायकवाड यांना काळं फासल्यानंतर महाविकास आघाडीच्या नेत्यांनी आक्रमक निषेध नोंदवला आहे. या प्रकरणाचे पडसाद मराठा समाजातही उमटले आहेत. याच पार्श्वभूमीवर आयोजित केलेल्या बैठकीत राडा झाल्याची घटना घडली आहे.
नेमकं काय घडलं?
सोलापुरात संभाजी ब्रिगेडचे प्रदेशाध्यक्ष प्रवीण गायकवाड यांच्यावर झालेल्या शाईफेक हल्ल्याच्या निषेधार्थ बैठकीचं आयोजन करण्यात आलं होतं. याच बैठकीत गोंधळ झाला. जन्मजयराजे भोसले यांच्या कार्यकर्त्याकडून एका कार्यकर्त्याला मारहाण करण्यात आली. या हाणामारीच्या घटनेनंतर बैठकस्थळी एकच खळबळ उडाली. दोन्ही गटाच्या कार्यकर्त्यांनी एकमेकांविरोधात घोषणाबाजी केली.
