दिवाळीच्या सणासाठी चकली, चिवडा, फरसाण आणि इतर फराळाचे पदार्थ खरेदी करत असाल, तर ही बातमी तुमच्यासाठी महत्त्वाची आहे! सणासुदीच्या काळात खाद्यपदार्थांच्या गुणवत्तेचा प्रश्न ऐरणीवर आला असून, अन्न व औषध प्रशासन (FDA) ॲक्शन मोडमध्ये येण्याची चर्चा आहे. तुकाराम मुंढे यांच्या नेतृत्वाखाली भेसळखोरांवर आणि नियमांचे उल्लंघन करणाऱ्यांवर कारवाई होणार का, याकडे सर्वांचं लक्ष लागलं आहे. नेमकं FDA चं नवं टार्गेट काय आहे आणि दिवाळीच्या फराळाबाबत कोणती खबरदारी घ्यावी? जाणून घेऊया सविस्तर.
एफडीएचे आयुक्त तुकाराम मुंढे यांनी अन्नपदार्थातील भेसळ रोखण्यासाठी आतापर्यंत शेकडो कारवाया केल्या आहेत. सध्या सणासुदीचा काळ आहे. मिटाई, फरसाण अशा खाद्यपदार्थांची या काळात मोठी विक्री होते. हीच बाब लक्षात घेऊन आता तुकाराम मुंढे यांनी नवी मोहीम उघडली आहे. थेट पत्रकार परिषद घेऊन तुकाराम मुंढे यांनी याबाबत माहिती दिलीय. दिवाळीच्या काळात एफडीएकडून नेमकं काय काय केलं जाणार? याची माहिती त्यांनी दिलीय.
दिवाळीत कारवाई वाढणार, या खाद्यपदार्थांवर नजर
तुकाराम मुंढे यांनी आज पत्रकार परिषद घेतली. या पत्रकार परिषदेत त्यांनी आतापर्यंत काय काय कारवाई करण्यात आली, याची सविस्तर माहिती दिली. तसेच सध्याच्या सणासुदीच्या काळात एफडीए काय कारवाई करणार, याबाबतही त्यांनी सांगितले. दिवाळी जवळ आली आहे. त्यामुळे आता आम्ही कारवाईचा वेग वाढवणार आहोत. दिवाळीच्या काळात फराळ, मिठाई, चकली, चिवडा आणि इतर वस्तूंची चौकशी केली जाणार आहे. दिवाळी संपेपर्यंत ही कारवाई सुरू राहणार आहे, अशी माहिती तुकाराम मुंढे यांनी दिली.
आतापर्यंत काय काय कारवाई केली?
सणासुदीच्या काळात आजारांच प्रमाण वाढतं. सणासुदीच्या काळात तारीख निघून गेलेले पदार्थ, दर्जाहीन पदार्थ यांची विक्री केली जाते. त्यामुळेही आजार वाढतात. दिवाळी सण जवळ आल्याने मसाले निर्मिती करणाऱ्या 1057 मसाला आस्थापनांवर कारवाई करून चौकशी करण्यात आली आहे. यात 94 आस्थापनांचे परवाने निलंबित करण्यात आलेले आहेत. 11963 क्विंटल मसाले व मसालेजन्य पदार्थ जप्त करण्यात आले आहेत. जप्त करण्यात आलेल्या मसाल्यांची किंमत 19.69 कोटी रुपये आहे. गोडाऊन आणि कारखान्यांमध्ये ही कारवाई करण्यात आलीय, असे तुकाराम मुंढे यांनी सांगितले आहे.
दुकानदारांनाही घ्यावी लागणार काळजी?
दरम्यान तुकाराम मुंढे यांनी दिवळसणात एफडीए आपली कारवाई वाढवणार आहे, असे सांगितल्याने व्यापारी, दुकानदारांना काळजी घ्यावी लागणार आहे. या निर्णयाचे स्वागत केले जातेय. त्यामुळे आता एफडीएच्या कारवाईत कोण लक्ष्य होणार, भविष्यात काय होणार, हे पाहणे महत्त्वाचे ठरणार आहे.
