राज्याचे दिव्यांग कल्याण विभागाचे सचिव तुकाराम मुंढे मालेगावातील एका अंध शाळेची मान्यता रद्द करत शाळेला मोठा दणका दिला आहे. अंधशाळेत प्रत्यक्षात केवळ ७ अंध विद्यार्थी असताना, कागदोपत्री ५० विद्यार्थी दाखवत शासनाची फसवणूक केल्याप्रकरणी अनेक तक्रारी दाखल होत होत्या. त्या नुसार चौकशी करत या शाळेची मान्यता रद्द करण्यात आली आहे.
मालेगाव येथील रावळगाव नाका भागात अंध शिक्षण व प्रशिक्षण संस्था या नावाने सुरू अंधशाळेत प्रत्यक्षात केवळ ७ अंध विद्यार्थी असताना, कागदोपत्री ५० विद्यार्थी दाखविण्यात आले होते. तसेच २४ शिक्षक व शिक्षकेतर कर्मचारी दाखवून वसतिगृह अनुदान, वेतन-भत्ते व इतर अनुषंगिक लाभ लाटण्यात आले. वर्षांनुवर्षे ही लूट सुरू असल्याने शासनाची लाखो रुपयांची आर्थिक फसवणूक करण्यात आल्याची तक्रार सामाजिक कार्यकर्ते विठोबा द्यानद्यान यांनी केली होती.
या प्रकरणाची दखल घेत नाशिक जिल्हा परिषदेच्या समाज कल्याण विभागाने नेमलेल्या चौकशी समितीने प्रत्यक्ष शाळेला भेट देऊन तपासणी केली असता, तक्रारीत तथ्य आढळून आले. त्यानंतर जिल्हा परिषदेच्या मुख्य कार्यकारी अधिकाऱ्यांनी या शाळेची मान्यता रद्द करण्याचा प्रस्ताव दिव्यांग कल्याण आयुक्त,पुणे यांच्याकडे पाठवला होता. या प्रकरणाची सुनावणी घेतल्यानंतर गेल्या ३ मे रोजी आयुक्तांनी अंधशाळेची मान्यता रद्द करण्याचे आदेश दिले.
या आदेशाविरोधात संबंधित संस्था चालकांनी महाराष्ट्र शासनाच्या दिव्यांग कल्याण विभागाचे सचिव तुकाराम मुंढे यांच्याकडे अपील दाखल केले होते. त्या अपिलावर सुनावणी घेतल्यानंतर मुंढे यांनी सदर अंध निवासी शाळेची मान्यता रद्द करण्याचा आयुक्तांचा आदेश कायम ठेवण्याचा निर्णय दिला आहे. त्यामुळे अपील करणाऱ्या संस्थाचालकांना मोठी चपराक बसली असल्याचे मानले जात आहे.
