एक भीषण अपघाताची घटना समोर आली आहे. आज पहाटे मालेगाव–मनमाड महामार्गावर भीषण अपघात घडला असून, या अपघातात चार जणांचा जागीच मृत्यू झाला आहे. ही दुर्घटना मालेगाव तालुक्यातील वऱ्हाणे गावाजवळ पहाटे तीन वाजण्याच्या सुमारास घडली. या दुर्घटनेत चार जणांचा मृत्यू झाला असून दोन जण गंभीर जखमी तर २० पेक्षा अधिक प्रवासी किरकोळ जखमी झालेत.
माहितीनुसार, पुण्याकडून मालेगावच्या दिशेने येणारी एक खासगी ट्रॅव्हल्स आणि समोरून येणाऱ्या पिकअप वाहनाची समोरासमोर जोरदार धडक झाली. ही धडक ही इतकी जोरात होती की, पिकअप वाहन थेट ट्रॅव्हल्समध्ये घुसले. या दुर्घटनेत बसच्या पुढील भागाचे मोठे नुकसान झाले. या अपघातात चार प्रवाशांचा जागीच मृत्यू झाला, तर दोन जण गंभीर जखमी झाले आहेत. याशिवाय ट्रॅव्हल्समधील २० हून अधिक प्रवासी किरकोळ जखमी झाले.
जखमींना मालेगाव सामान्य रुग्णालयात हलवण्यात आले असून, काहींची प्रकृती चिंताजनक असल्याचे सांगण्यात येत आहे. दरम्यान, पोलिसांनी घटनास्थळी पंचनामा केला असून, अपघाताचे नेमके कारण अद्याप अस्पष्ट आहे. अधिक तपास पोलिसांकडून सुरु आहे.
