पिंपरी चिंचवड येथून एक धक्कादायक घटना समोर आली आहे. महापालिकेच्या शाळेत इमारतीच्या तिसऱ्या मजल्यावरून पडून एका विद्यार्थ्याचा मृत्यू झाल्याचा प्रकार उघडकीस आला आहे. या घटनेने परिसरात एकच खळबळ उडाली आहे.
याबाबत मिळालेल्या माहितीनुसार , सार्थक कांबळे असे मृत्युमुखी पडलेल्या विद्यार्थ्याचे नाव आहे. काळेवाडीत राहणारा सार्थक हुतात्मा चाफेकर विद्यामंदिर शाळेत आठवीच्या वर्गात होता. तेथील विद्यार्थ्यांनी पोलिसांना या संदर्भात माहिती दिली आहे. जिन्याच्या रेलिंगवर घसरगुंडी खेळताना ही दुर्दैवी घटना घडली आहे. या घटनेने शाळेच्या परिसरात एकच शोककळा पसरली होती.
साधारण दहाच्या सुमारास सार्थक तिसऱ्या मजल्याच्या पायऱ्यांवरील लोखंडी रेलिंगवर खेळत होता. पण रेलिंगवर घसरगुंडी खेळणं धोकादायक होतं. याची कल्पना असल्यानं एका मित्राने तू इथं खेळू नकोस, खाली पडशील, तुला लागेल, असं म्हणत रेलिंगवरून खाली उतरण्याचा सल्ला दिला. मात्र त्याने तो ऐकला नाही, तो त्याच्याच धुंदीत होता. मात्र अचानकपणे त्याचा तोल गेला आणि तो थेट तळ मजल्याच्या डक्टमध्ये पडला, अशी माहिती सार्थकच्या मित्रांनी दिल्याचं पोलिसांनी सांगितलं. या अपघातात सार्थकला जोराचा मार लागला, तातडीनं त्याला रुग्णालयात हलविण्यात आलं. पण दुर्दैवाने त्याचा मृत्यू झाला. चिंचवड पोलीस याप्रकरणी अधिकचा तपास करत आहेत.
