सातारा : सातारा पोलीस दलाची शान आणि देशाचे नाव उंचावणारा सातारा पोलिस दलाच्या बॉम्‍ब शोधक पथकातील 'सूर्या' श्वानाचा मंगळवारी हृदयविकारानं मृत्यू झाला. शासकीय इतमामात मानवंदना देवून सूर्यावर अंत्यसंस्कार करण्यात आले.
झारखंडमधील ऑल इंडिया ड्युटी मीट स्पर्धेत सूर्यानं सुवर्णपदक पटकावत सातारा जिल्हा पोलीस दलाच्या शिरपेचात मानाचा तुरा खोवला होता.
सूर्याच्या अकाली निधनाने केवळ सातारा पोलीस दलातच नव्हे, तर संपूर्ण सातारा शहरात हळहळ व्यक्त होत आहे. त्याच्या निधनामुळे सातारा जिल्हा पोलीस दलात एक मोठी पोकळी निर्माण झाली आहे. सातारा पोलीस दलाकडून कर्तव्यदक्ष सूर्याला साश्रू नयनांनी अखेरचा निरोप देण्यात आला.
सूर्याचे पार्थिव पोलीस मुख्यालयात अंत्यदर्शनासाठी आणण्यात आले. तेव्हा संपूर्ण परिसरात एकच शांतता पसरली होती. पोलीस दलातील अधिकारी, कर्मचारी आणि सातारकर नागरिक मोठ्या संख्येने उपस्थित होते.
यावेळी सर्वांच्या डोळ्यात अश्रू होते. तसेच चेहऱ्यावर सूर्याला गमावल्याचे दुःख स्पष्ट दिसत होते. पोलीस अधीक्षक तुषार दोषी, अप्पर पोलीस अधीक्षक वैशाली कडुकर, स्थानिक गुन्हे शाखेचे पोलीस निरीक्षक अरुण देवकर यांनी सूर्याला पुष्पचक्र अर्पण करत श्रद्धांजली वाहिली.
यावेळी सातारा पोलीस दलाने सूर्याला मानवंदना दिली. या मानवंदनेने सूर्याने केलेल्या अतुलनीय सेवेला सलाम करण्यात आला.
सूर्या केवळ एक श्वान नव्हता, तर तो सातारा पोलीस दलाचा एक अविभाज्य भाग होता. झारखंड राज्यातील रांची येथे झालेल्या अखिल भारतीय पोलीस कर्तव्य मेळाव्यामध्ये सूर्याने एक्सप्लोसिव्ह युनिटमध्ये सुवर्णपदक पटकावले.
यामुळे महाराष्ट्र पोलीस आणि विशेषतः सातारा पोलीस दलाच्या शिरपेचात मानाचा तुरा खोवला होता. या प्रतिष्ठित स्पर्धेत देशभरातील ४४ संघांनी भाग घेतला होता. या कडव्या स्पर्धेत सातारा जिल्हा पोलीस दलाच्या इतिहासात पहिल्यांदाच सूर्याने सुवर्णपदक मिळवून जिल्ह्याचे आणि राज्याचे नाव राष्ट्रीय स्तरावर उज्ज्वल केले होते. त्याची ही कामगिरी अजूनही अनेकांच्या स्मरणात आहे.
