राजकारणातून एक मोठं बातमी समोर आली आहे. काँग्रेसच्या एका माजी आमदाराला पोलिसांनी नोटीस बजावली आहे. चिखलीचे काँग्रेसचे माजी आमदार राहुल बोंद्रे यांच्या शैक्षणिक संस्थांची पोलिसांकडून चौकशी सुरू असून, संबंधित संस्थांना माहिती सादर करण्यासाठी नोटीस बजावण्यात आली आहे. १९९३ पासून संस्थांशी संबंधित विविध कागदपत्रे आणि माहिती पंधरा दिवसांच्या आत सादर करण्याचे निर्देश नोटिशीत देण्यात आल्याचे समजते. अनुराधा अभियांत्रिकी महाविद्यालयाने तपासात सहकार्य न केल्याच्या कारणावरूनही पोलिसांनी नोटीस बजावली आहे. बोंद्रे यांच्या शैक्षणिक संस्थांवर बनावट कागदपत्रांच्या आधारे शासकीय निधी मिळवल्याचा तसेच बनावट दस्तऐवज तयार करून शासकीय जमीन बळकावल्याचा आरोप आहे. या प्रकरणांमध्ये बोंद्रे सध्या तीन गुन्ह्यांत जामिनावर आहेत.
दरम्यान, काँग्रेसमध्ये राहण्याचा निर्णय घेतल्यानंतर अडचणी येण्याची अपेक्षा होती, असे बोंद्रे यांनी म्हटले आहे. आपल्यासह कार्यकर्त्यांवर खोटे गुन्हे दाखल करण्यात आल्याचा दावा करत, राहुल गांधी यांच्या ‘डरो मत’ या संदेशाचे पालन करणार असल्याचेही त्यांनी स्पष्ट केले.
