राज्यात परतीच्या पावसाला सुरुवात झाली असून काही ठिकाणी तापमान वाढल्यामुळे नागरिकांना उन्हाचा चटका सोसावा लागत आहे. गेल्या काही दिवसांपासून राज्यातील हवामानात चढ-उतार सुरू असून, काही ठिकाणी ढगाळ वातावरण तर काही भागांत कडक ऊन अशी स्थिती आहे. दरम्यान, आज कोकण, मध्य महाराष्ट्र आणि मराठवाड्यातील काही भागांत पुन्हा पावसाला पोषक वातावरण निर्माण झाले आहे.
भारतीय हवामान विभागाकडून अनेक राज्यांना पुढील 24 तासांमध्ये मुसळधार पवासाचा हाय अलर्ट देण्यात आला आहे. मंगळवारी पावसाचा जोर आणखी वाढण्याची शक्यता आहे. महाराष्ट्रात देखील काही ठिकाणी जोरदार पावसाची शक्यता आहे.
भारतीय हवामान विभागाने दिलेल्या माहितीनुसार अनेक राज्यांमध्ये मंगळवारी मुसळधार पावसाची शक्यता असून, सोबतच वादळी वाऱ्याचा देखील इशारा देण्यात आला आहे. या काळात वाऱ्याचा वेग ताशी 70 ते 80 किमी एवढा प्रचंड राहणार आहे. तसेच काही ठिकाणी विजांचा कटकडाट आणि मेघगर्जनेसह पावसाची शक्यता आहे.
आयएमडीकडून मंगळवारी उत्तर प्रदेश, दिल्ली, बिहार, झारखंड, ओडिशा, राजस्थान, हरियाणा, उत्तराखंड, हिमाचल प्रदेश, जम्मू-काश्मीर, लडाख, पश्चिम बंगाल, ओडिशा, छत्तीसगड, तेलंगाणा, आंध्र प्रदेश, आसाम, मेघालय, त्रिपुरा, नागालँड, सिक्किम, तामिळनाडू, मेघालय आणि गुजरात या 24 राज्यांमध्ये अतिमुसळधार पावसाचा इशारा देण्यात आला आहे.
पावसासोबतच प्रति तास 70 ते 80 किमी एवढ्या प्रचंड वेगाने वारे वाहणार असल्यानं या काळात मच्छिमार बांधवांनी समुद्रात मासेमारीसाठी जाऊ नये, असं आवाहानही हवामान विभागाकडून करण्यात आलं आहे.
महाराष्ट्राबाबत बोलायचं झाल्यास मंगळवारी राज्यातील आठ जिल्ह्यांना पावसाचा इशारा देण्यात आला आहे, त्यामध्ये पुणे, सातारा, कोल्हापूर, रायगड, रत्नागिरी, नाशिक, सोलापूर आणि सांगली या जिल्ह्यांचा समावेश आहे.
