पाकिस्तानच्या राजकारणात मोठी खळबळ उडाली आहे. इम्रान खान यांच्या अडचणी सातत्याने वाढत असताना त्यांना पुन्हा मोठा धक्का बसला आहे. फेडरल इन्व्हेस्टिगेशन एजन्सी (FIA) च्या विशेष न्यायालयाने तोशाखाना-२ प्रकरणात पीटीआयचे संस्थापक इम्रान खान आणि त्यांची पत्नी बुशरा बीबी यांना प्रत्येकी १७ वर्षांची शिक्षा सुनावली. हा निर्णय रावळपिंडीच्या अडियाला तुरुंगात सुनावण्यात आला, जिथे इम्रान खान सध्या बंदिस्त आहे.
नेमकं प्रकरण काय ?
हे प्रकरण मे २०२१ चे आहे, जेव्हा इम्रान खान यांना अधिकृत दौऱ्यादरम्यान सौदी अरेबियाच्या क्राउन प्रिन्सकडून बुल्गारी ज्वेलरी सेट भेट म्हणून मिळाले होते. आरोपानुसार ही ज्वेलरी अतिशय कमी किंमतीत खरेदी करण्यात आली आणि नियमांनुसार ती सार्वजनिक खजिन्यात जमा करण्यात आली नाही ज्यामुळे सरकारी खजिन्याचे नुकसान झाले.
विशेष न्यायाधीश सेंट्रल शाहरुख अर्जुमंद यांनी ८० पेक्षा जास्त सुनावण्या घेतल्यानंतर निर्णय सुनावला. न्यायालयाने इम्रान खान यांना पाकिस्तान दंड संहितेच्या कलम ३४ आणि ४०९ अंतर्गत १० वर्षांची कठोर कैद सुनावली. याशिवाय प्रिव्हेन्शन ऑफ करप्शन अॅक्टच्या कलम ५ (२) अंतर्गत ७ वर्षांची वेगळी शिक्षा सुनावली. त्याचप्रमाणे बुशरा बीबी यांनाही त्याच कलमांखाली एकूण १७ वर्षांची शिक्षा सुनावली.
न्यायालयाने दोघांवर एकूण १ कोटी ६४ लाख पाकिस्तानी रुपयांचा दंडही ठोठावला आहे. न्यायालयाने स्पष्ट केले की जर दंड भरला नाही तर शिक्षेची मुदत आणखी वाढवली जाऊ शकते.
