थंडीची चाहूल लागलेली असतानाच देशाच्या हवामानात मोठी उलथापालथ होण्याची शक्यता आहे. अनेक भागांत पावसाचे ढग दाटणार असून वादळी वाऱ्यांमुळे नागरिकांची चिंता वाढली आहे. हवामान विभागाकडून १५ राज्यांना सतर्कतेचा इशारा देण्यात आला आहे.
राज्यांमध्ये पाऊस आणि वादळी वाऱ्यांचा सामना करावा लागू शकतो. भारतीय हवामान विभागाने १२ नोव्हेंबर रोजी म्हणजेच आज देशातील १५ राज्यांसाठी पावसाचा अलर्ट दिला आहे. त्यामुळे नागरिकांनी हवामानाच्या अंदाजाकडे लक्ष देण्याची गरज आहे.
हवामान विभागाच्या अंदाजानुसार, दिल्ली, उत्तर प्रदेश, बिहार, राजस्थान, उत्तराखंड आणि हिमाचल प्रदेश या राज्यांमध्ये पावसाची शक्यता वर्तवण्यात आली आहे. याशिवाय पंजाब आणि जम्मू-काश्मीरमध्येही हवामान बदलू शकते. काही ठिकाणी विजांच्या कडकडाटासह पाऊस पडण्याची शक्यता असून जोरदार वारे वाहू शकतात.
पूर्व आणि मध्य भारतातील काही राज्यांनाही या बदलत्या हवामानाचा फटका बसण्याची शक्यता आहे. पश्चिम बंगाल, ओडिशा, झारखंड, छत्तीसगड आणि मध्य प्रदेशमध्ये पावसाचा अंदाज व्यक्त करण्यात आला आहे. तर दक्षिण भारतातील आंध्र प्रदेश आणि कर्नाटक या राज्यांमध्येही पावसाची शक्यता असल्याचे सांगण्यात आले आहे. या काळात वाऱ्यांचा वेग ताशी ६५ ते ७० किलोमीटरपर्यंत पोहोचू शकतो. पावसामुळे काही भागांतील तापमानात बदल जाणवू शकतो. नागरिकांनी हवामान विभागाकडून वेळोवेळी दिल्या जाणाऱ्या सूचनांचे पालन करावे.
महाराष्ट्रात हुडहुडी! महाराष्ट्रात थंडीला सुरुवात झाली असून तापमान १५ अंश सेल्सिअसच्या खाली घसरायला सुरुवात झाली आहे. दरम्यान निफाड येथे १२ अंश सेल्सिअस तापमान आज नोंदवले गेले. तसेच राज्याच्या कमाल आणि किमान तापमानात चढ-उतार कायम राहण्याचा अंदाज हवामान विभागाने वर्तवला आहे.
