रात्रीची वेळ... सर्वत्र शांतता आणि नागरिक गाढ झोपेत असतानाच अचानक जमीन हादरू लागली! भूकंपाचे जोरदार धक्के जाणवताच नागरिकांमध्ये एकच घबराट पसरली. अनेकांनी सुरक्षिततेसाठी घराबाहेर धाव घेतली. या भूकंपाची तीव्रता रिश्टर स्केलवर ४.९ इतकी नोंदवण्यात आली आहे.
भारताचा शेजारी देश असलेल्या नेपाळमध्ये पुन्हा एकदा भूकंपाचे धक्के जाणवले आहेत. आज पहाटेच्या सुमारास नेपाळमधील काही भागांमध्ये भूकंपाचे जोरदार झटके बसले. अचानक जमीन हादरल्याने नागरिकांमध्ये घबराट पसरली. पहाटेची वेळ असल्याने अनेक लोक झोपेत होते. मात्र, भूकंपाचे धक्के जाणवताच नागरिकांमध्ये भीतीचे वातावरण निर्माण झाले. भारताच्या राष्ट्रीय भूकंप विज्ञान केंद्राने या भूकंपाची अधिकृत माहिती दिली आहे.
केंद्राने आपल्या सोशल मीडिया प्लॅटफॉर्मवर यासंदर्भात माहिती शेअर केली. त्यानुसार, आज सकाळी ४ वाजून ३० मिनिटांनी नेपाळमध्ये भूकंपाची नोंद करण्यात आली. या भूकंपाची तीव्रता रिश्टर स्केलवर ४.९ इतकी मोजण्यात आली आहे. तसेच भूकंपाचा केंद्रबिंदू जमिनीखाली सुमारे ७३ किलोमीटर खोल असल्याची माहिती समोर आली आहे.
नेपाळ हा भूकंपाच्या दृष्टीने संवेदनशील भागांपैकी एक मानला जातो. त्यामुळे या भागात वेळोवेळी भूकंपाचे धक्के जाणवत असतात. नेपाळमध्ये यापूर्वीही मोठ्या भूकंपाच्या घटना घडल्या आहेत. त्यामुळे प्रत्येक वेळी भूकंपाचे धक्के जाणवल्यानंतर नागरिकांमध्ये भीती निर्माण होते. दरम्यान, या भूकंपामुळे नेमके किती नुकसान झाले, तसेच कोणतीही जीवितहानी झाली आहे का, याबाबत अद्याप कोणतीही माहिती समोर आलेली नाही.
