राज्यात पर्वा विधानसभा निवडणूक पार पडणार असून या पार्श्वभूमीवर राजकीय पक्षांच्या रणधुमाळी सुरु आहेत. पक्षांच्या प्रचाराचा धुराळा उडाला आहे. दरम्यान राज्यात नव्याने महायुतीचे सरकार सत्तेत आल्यानंतर अन्नदाता शेतकऱ्यांची कर्जे माफ करू, असे आश्वासन उपमुख्यमंत्री तथा भाजप नेते देवेंद्र फडणवीस यांनी चांदवड येथील सभेत दिले. चांदवड-देवळा विधानसभा मतदारसंघात महायुतीचे उमेदवार डॉ. राहुल आहेर यांच्या प्रचारासाठी रविवारी येथील कृषी उत्पन्न बाजार समितीत उपमुख्यमंत्री फडणवीस यांची सभा घेण्यात आली.
शेतीसाठीच्या वीजपंपाचे साडेसात हॉर्सपॉवरपर्यंतचे वीजबिल आम्ही याआधीच माफ केले असून, राज्यात नव्याने महायुतीचे सरकार सत्तेत आल्यानंतर अन्नदाता शेतकऱ्यांची कर्जे माफ करू, असेदेवेंद्र फडणवीस यांनी म्हंटले आहे. महाविकास आघाडीचा जाहीरनामा निवडणुकीचे जुमले असून, लबाडाचं आवतन जेवल्याशिवाय खरं मानू नये, असा टोलाही त्यांनी लगावला.
देवेंद्र फडणवीस म्हणाले, नार-गिरणा प्रकल्प मार्गी लागल्याने देवळा तालुक्याच्या सिंचनाचा प्रश्न सुटला असला, तरी येत्या सहा महिन्यांत पार गोदावरी प्रकल्प मार्गी लावत चांदवड तालुक्यातील शेतकऱ्यांच्या सिंचनाचा प्रश्नही कायमस्वरूपी निकाली काढू, असा शब्द देताच उपस्थितांनी टाळ्यांचा कडकडाट केला. कांदा प्रश्नाने लोकसभेत चांगलाच वांदा केला असून, आम्हाला ठेच लागली आहे. पण यापुढे मोदी सरकारच्या काळात कधीही कांद्यावर अचानक निर्यातबंदी लावली जाणार नसल्याची ग्वाही त्यांनी शेतकऱ्यांना दिली. कर्नाटकमध्ये विरोधकांचे सरकार असून, त्या ठिकाणी सोयाबीनला सरासरी ३८०० रुपये भाव मिळत असून महायुती सरकार सोयाबीनसाठी सहा हजारांचा हमीभाव आम्ही देणार असल्याचा शब्दही त्यांनी दिला. मुख्यमंत्री लाडकी बहीण योजनेत सहाशे रुपयांची वाढ करून २१०० रुपये दरमहा देणार असल्याचेही ते म्हणाले.
तसेच ते पुढे म्हणाले ‘तुम्ही आमदार द्या, मी तुम्हाला मंत्री देतो’चांदवड-देवळा विधानसभा मतदारसंघाचे तिकीट देताना अनेक घडामोडींना सामोरे जावे लागले. यादरम्यान डॉ. राहुल आहेर यांची अवस्था रणांगणातल्या अर्जुनाप्रमाणे झाली होती. मात्र, मतदारसंघातील जनतेने आमचा आमदार आम्हीच ठरवणार, अशी मागणी लावून धरल्याने उमेदवारी डॉ. आहेरांना दिली. यावेळी ते हॅटट्रिक करतील, असा विश्वास असून, तुम्ही त्यांना वीस हजारांच्या वर लीड दिल्यास मी त्यांना कॅबिनेट मंत्रिपद आणि त्याच्या आत दिल्यास राज्य मंत्रिपद देईल, असा शब्दही फडणवीस यांनी दिला.
