राज्यातील आगामी विधानसभा निवडणुकीच्या पार्श्वभूमीवर राजकीय पक्ष जोरदार तयारीत असून निवडणुकीच्या प्रचाराला सुरुवात झाली आहे. तसेच पक्षांच्या स्टार प्रचारकांच्या चर्चेनाही उधाण आले आहे. दरम्यान अभिनेता भाऊ कदम यांनी उपमुख्यमंत्री अजित पवार यांच्या देवगिरी या निवासस्थानी जाऊन अजित पवार यांची सदिच्छ भेट घेतली. मराठी बिग बॉसचा विजेता सुरज चव्हाण याच्याप्रमाणे अभिनेता भाऊ कदम देखील आता अजित पवार यांचा प्रचार करणार का याबाबत देखील चर्चा सुरू आहे. उपमुख्यमंत्री अजित पवार यांच्या भेटीवर आता भाऊ कदम यांची अधिकृत प्रतिक्रिया समोर आली आहे.
दरम्यान, या भेटीनंतर भाऊ कदम हे राष्ट्रवादीमध्ये प्रवेश करणार असल्याची चर्चा सुरू झाली होती. यावर आता भाऊ कदम यांनी प्रतिक्रिया दिली आहे. त्यांनी लाडकी बहीण योजनेचं कौतुक केलं आहे, ‘अजितदादांच्या पक्षाचा प्रचार करायला मला आवडेल, एकच दादा अजित दादा आहेत, त्यामुळे त्यांच्या पक्षाचा स्टार प्रचारक व्हायला मला आवडेल. त्यांनी लाडकी बहीण योजना आणली आहे, आणि त्यांनी आमचे कलाकारांचे अनेक प्रश्न सोडवले आहेत, असं भाऊ कदम यांनी म्हटलं आहे.
