अभिनेता अजय देवगण याच्या बहुप्रतीक्षित ‘दृश्यम 3’ या चित्रपटाची साह्य सर्वत्र चर्चा आहे. कारण या चित्रपटाने रिलीजआधीच भक्कम कमाई केली आहे. अजय देवगणचे दृश्यम, आणि दृश्यम २ या चित्रपटांना देखील चाहत्यांनी भरभरून प्रेम दिल होतं. दरम्यान आता पुन्हा एकदा अजय देवगणचा दृश्यम 3’ची हा चित्रपट देखील चाहत्यांच्या मनोरंजनासाठी सज्ज झाला आहे.
अजय देवगणच्या बहुप्रतीक्षित ‘दृश्यम 3’ या चित्रपटाची प्रेक्षकांमध्ये चांगलीच उत्सुकता आहे. ‘दृश्यम: द कन्क्लुजन’ नावाने चर्चेत असलेल्या या चित्रपटाच्या प्रदर्शनाला आता काही दिवसच शिल्लक आहेत. त्याआधीच चित्रपटाच्या ॲडव्हान्स बुकिंगला जोरदार प्रतिसाद मिळताना दिसत आहे. 29 सप्टेंबरच्या दुपारपर्यंतच्या आकडेवारीनुसार, ‘दृश्यम 3’ने पहिल्या दिवसाच्या ॲडव्हान्स बुकिंगमधून सुमारे 8.97 कोटी रुपयांची कमाई केल्याचं वृत्त आहे. तर पहिल्या तीन दिवसांसाठी झालेल्या ॲडव्हान्स बुकिंगचा आकडा 17.35 कोटी रुपयांपर्यंत पोहोचल्याचं सांगितलं जात आहे.
चित्रपटाच्या पहिल्या दिवसासाठी आतापर्यंत सुमारे 2.24 लाख तिकिटांची विक्री झाल्याची माहिती समोर आली आहे. यासाठी सुमारे 7,505 शो बुक झाल्याचंही वृत्त आहे. ब्लॉक केलेल्या सीट्सच्या रकमेसह पहिल्या तीन दिवसांच्या ॲडव्हान्स बुकिंगमधून 17.35 कोटी रुपयांची कमाई झाल्याचं सांगितलं जात आहे.
‘दृश्यम 3’च्या ॲडव्हान्स बुकिंगमध्ये महाराष्ट्र आणि दिल्लीचा मोठा वाटा असल्याचं दिसत आहे. पहिल्या दिवसाच्या बुकिंगमधून महाराष्ट्रात सुमारे 2.93 कोटी रुपये, तर दिल्लीमध्ये सुमारे 2.19 कोटी रुपये जमा झाल्याची माहिती समोर आली आहे. या सुरुवातीच्या ट्रेंडमुळे चित्रपटाच्या बॉक्स ऑफिस ओपनिंगबाबतही चर्चा सुरू झाली आहे. काही ट्रेड रिपोर्ट्समध्ये सध्याचा ॲडव्हान्स बुकिंगचा वेग कायम राहिल्यास चित्रपटाची भारतातील ओपनिंग सुमारे 40 कोटी रुपयांपर्यंत जाऊ शकते, असा अंदाज व्यक्त करण्यात आला आहे. मात्र, अंतिम कमाई प्रदर्शनानंतरच स्पष्ट होणार आहे.
2022 मध्ये प्रदर्शित झालेल्या अजय देवगणच्या ‘दृश्यम 2’ने पहिल्या दिवशी भारतात सुमारे 15.38 कोटी रुपये नेट कमाई केली होती. तर पहिल्या वीकेंडमध्ये चित्रपटाने 64.14 कोटी रुपयांची कमाई केली होती. आता ‘दृश्यम 3’च्या जोरदार ॲडव्हान्स बुकिंगमुळे या आकड्यांशी तुलना सुरू झाली आहे. विशेष म्हणजे, काही रिपोर्ट्सनुसार ‘दृश्यम 3’ने रिलीजपूर्वीच ‘दृश्यम 2’च्या अंतिम ॲडव्हान्स बुकिंगचा आकडा ओलांडल्याचं समोर आलं आहे. त्यामुळे चित्रपटाच्या पहिल्या दिवसाच्या कमाईकडे बॉक्स ऑफिस विश्लेषक आणि चाहत्यांचं लक्ष लागलं आहे.
‘दृश्यम 3’मध्ये अजय देवगण पुन्हा एकदा विजय साळगावकर या भूमिकेत दिसणार आहे. त्याच्यासोबत तब्बू, श्रिया सरन, रजत कपूर आणि इशिता दत्ता हे कलाकारही महत्त्वाच्या भूमिकांमध्ये आहेत. याशिवाय जॅकी श्रॉफ आणि काही नव्या कलाकारांचीही चित्रपटात एन्ट्री झाली आहे. चित्रपटाचं दिग्दर्शन अभिषेक पाठक यांनी केलं आहे.
2 ऑक्टोबरला चित्रपट होणार प्रदर्शित
‘दृश्यम 3’ हा चित्रपट 2 ऑक्टोबर 2026 रोजी प्रेक्षकांच्या भेटीला येणार आहे. ‘दृश्यम’ फ्रँचायझीच्या आधीच्या दोन भागांना मिळालेला प्रतिसाद पाहता तिसऱ्या भागाकडूनही मोठ्या अपेक्षा आहेत. आता ॲडव्हान्स बुकिंगला मिळत असलेला प्रतिसाद चित्रपटाच्या प्रत्यक्ष बॉक्स ऑफिस कमाईत कितपत बदलतो आणि ‘दृश्यम 3’ पहिल्या दिवशी किती कमाई करतो, हे प्रदर्शनानंतरच स्पष्ट होईल.
