रेशनकार्डधारकांसाठी ही बातमी महत्त्वाची आहे. प्रशासनाने मोठी कारवाई करत अवघ्या महिनाभरात तब्बल १३,२४१ लाभार्थ्यांचे रेशन बंद केले आहे. या कारवाईमागे नेमकं कारण काय आहे, कोणत्या लाभार्थ्यांवर ही कारवाई करण्यात आली आणि तुमचं रेशनही बंद होऊ शकतं का? जाणून घेऊया सविस्तर.
गरजू आणि गरीब नागरिकांसाठी शासनाकडून राबवण्यात येणाऱ्या मोफत धान्य योजनेचा लाभ अपात्र व्यक्ती घेत असल्याचे समोर आले आहे. नागपूर शहरात अशा लाभार्थ्यांची पडताळणी करून गेल्या दीड महिन्यात तब्बल १३ हजार २४१ लाभार्थ्यांना अपात्र ठरविण्यात आले आहे. शासनाच्या ‘मिशन सुधार’ मोहिमेंतर्गत ही कारवाई करण्यात येत आहे. एखादं गरीब आणि गरजू कुटुंब उपाशी राहू नये, यासाठी पात्र लाभार्थ्यांना शासनाकडून पूर्णपणे मोफत धान्य उपलब्ध करून दिले जाते. मात्र, या योजनेच्या निकषात न बसणारे काही लाभार्थीही याचा लाभ घेत असल्याची बाब प्रशासनाच्या पडताळणीत समोर आली. त्यानंतर अपात्र लाभार्थ्यांची नावे शोधून ती योजनेतून वगळण्याची प्रक्रिया सुरू करण्यात आली आहे.
या निकषांमधून नागपूर शहरात आतापर्यंत तब्बल ५५,६२२ लाभार्थ्यांचे मोफत धान्य बंद करण्यात आले आहे. यामध्ये गेल्या दीड महिन्यात कारवाई करण्यात आलेल्या १३ हजार २४१ लाभार्थ्यांचाही समावेश आहे. प्रशासनाकडून लाभार्थ्यांची माहिती तपासून पात्रता निकष पूर्ण न करणाऱ्या व्यक्तींवर कारवाई केली जात आहे. दरम्यान, नागपूर शहरात सुमारे १ लाख ८५ हजार ५५० लाभार्थी संशयास्पद आढळले असून, त्यांची नावे टप्प्याटप्प्याने लाभार्थी यादीतून वगळण्यात येत आहेत. त्यामुळे येत्या काळात अपात्र लाभार्थ्यांची संख्या आणखी वाढण्याची शक्यता आहे.
सध्या नागपूर शहरात ३ लाख ९५ हजार ६०५ लाभार्थी मोफत धान्य योजनेचा लाभ घेत आहेत. या योजनेचा लाभ खऱ्या अर्थाने गरजू नागरिकांपर्यंत पोहोचावा, यासाठी प्रशासनाकडून लाभार्थ्यांची छाननी सुरू आहे. ‘मिशन सुधार’ मोहिमेच्या माध्यमातून अपात्र लाभार्थी वगळले जात असल्याने शासनाच्या धान्य योजनेतील गैरप्रकारांना आळा घालण्याचा प्रयत्न केला जात आहे. त्यामुळे पात्र लाभार्थ्यांना नियमितपणे धान्याचा लाभ मिळण्यास मदत होणार आहे.
