राजकारणातील घडामोडींना वेग आला असून दरम्यान आता पुन्हा एकदा राजकीय वर्तुळातून मोठी बातमी समोर येत आहे. एकनाथ शिंदे आणि उद्धव ठाकरे एकत्र येणार असल्याच्या चर्चा सुरु असताना आता एक मोठी बातमी समोर येत आहे. एकनाथ शिंदे आणि उद्धव ठाकरे एकत्र येऊ शकतात असं भाकीत महायुतीमधील बड्या नेत्यानं वर्तवलं आहे, यामुळे आता चर्चेला उधाण आलं आहे.
एकीकडे मनसे प्रमुख राज ठाकरे आणि शिवसेना ठाकरे गट प्रमुख उद्धव ठाकरे यांची युती होऊ शकते अशी चर्चा सध्या राज्यात सुरू आहे, ही चर्चा सुरू असतानाच आता प्रताप सरनाईक यांनी मोठं वक्तव्य केलं आहे. राज ठाकरे आणि उद्धव ठाकरे जसे एकत्र आले तसे उद्धव ठाकरे आणि एकनाथ शिंदेही एकत्र येऊ शकतात, असं वक्तव्य सरनाईक यांनी केलं आहे, सरनाईक यांच्या या विधानानं राजकीय वर्तुळात चर्चेला उधाण आलं आहे.
दरम्यान उद्धव ठाकरे यांनी शिवसेना शिंदे गटावर जोरदार हल्लाबोल केला होता, जादूटोणा करून आमदार निवडून आले असं त्यांनी म्हटलं, त्यावर देखील सरनाईक यांनी प्रतिक्रिया दिली आहे. तुमचे आमदार निवडून आले हे काय जादूटोणा न करता आले? आणि आमचे जादूटोणा करून आले का? तुमचे लोकसभेला खासदार जादूटोणा करूनच निवडून आले होते का? असा सवाल सरनाईक यांनी यावेळी केला. एकनाथ शिंदे शिवसेनेचे ब्रँड आहेत. आमच्या पक्षाचा ब्रँड म्हणजे एकनाथ शिंदे, असंही यावेळी सरनाईक यांनी म्हटलं आहे.
