एका बेपत्ता पोलीस कर्मचाऱ्याचा शोध घेत असताना पोलिसांनाच धक्का बसला.एखाद्या चित्रपटाच्या कथेला शोभेल अशीच काहीशी घटना वैजापूर येथे घडली आहे. देवगाव रंगारी ठाण्यात कार्यरत असलेल्या एका पोलिस कर्मचाऱ्याचा निघृण खून करून त्यांचा मृतदेह घराशेजारीच पुरल्याची धक्कादायक घटना वैजापूर येथे उघडकीस आलीय. ४८ वर्षीय नानासाहेब रामजी दिवेकर असे मृत पोलिस कर्मचाऱ्याचे नाव आहे. या घटनेनंतर संभाजीनगरमध्ये एकच खळबळ उडाली आहे.
प्रकरण नेमकं काय ?
नानासाहेब दिवेकर हे देवगाव रंगारी पोलीस ठाण्यात कार्यरत होते. ते सध्या छत्रपती संभाजीनगरमधील पडेगाव येथून कामावर ये-जा करत असत. १ जानेवारीपर्यंत त्यांनी आपले कर्तव्य बजावले. त्यानंतर वडिलांना भेटण्यासाठी ते आपल्या मूळगावी, म्हणजेच वैजापूर तालुक्यातील बळ्हेगावात आले होते. २ जानेवारीच्या सकाळपर्यंत ते सोशल मीडियावर देखील सक्रिय होते, मात्र त्यानंतर त्यांचा फोन बंद झाला आणि संपर्क साधण्याचा पर्यायही.
दोन दिवस झाले तरी वडील घरी परतले नाहीत , त्यात त्यांचा फोनही लागत नसल्याने नानासाहेबांच्या मुलाने बळ्हेगावच्या सरपंचांशी संपर्क साधला. सरपंचांनी गावातील त्यांच्या घरी आणि भावांकडे चौकशी केली असता, "ते २ तारखेला गावी आले होते, मात्र त्यानंतर कुठे गेले माहिती नाही," अशी उत्तरे मिळाली. संशय बळवल्याने मुलाने पोलिसांत धाव घेतली.
रविवारी दुपारी शिऊर पोलिसांनी बळ्हेगाव येथील घराची झडती घेतली. तपासादरम्यान नानासाहेब यांचा मोबाईल घराच्या पलंगाखाली सापडला. त्यानंतर पोलिसांनी घराच्या परिसराजवळ शोध घेतला. त्यावेळी त्यांना घराशेजारील पडीक जागेत ताजी माती उकरलेली दिसल्याने पोलिसांचा संशय बळावला. पोलिसांनी त्या जागेचे खोदकाम केले असता, सायंकाळी ६:३० च्या सुमारास नानासाहेबांचा पुरलेला मृतदेह पोलिसांना आढळला.
या प्रकरणी पोलिसांनी कुटुंबातील सदस्यांचे जबाब नोंदवले आहेत. मात्र, नातेवाइकांच्या जबाबात मोठी तफावत आढळल्याने पोलिसांनी संशयावरून नात्यातीलच तीन जणांना चौकशीसाठी ताब्यात घेतले आहे. प्राथमिक अंदाजानुसार, हा खून कौटुंबिक वादातून झाला असावा अशी शक्यता वर्तवली जात आहे.
नानासाहेब दिवेकर यांचा मृतदेह शवविच्छेदनासाठी छत्रपती संभाजीनगर येथील घाटी रुग्णालयात पाठवण्यात आला आहे. शिऊर पोलीस ठाण्यात रात्री उशिरा अज्ञातांविरुद्ध खुनाचा गुन्हा दाखल करण्यात आला असून, पुढील तपास सुरू आहे.
