भाजपच्या गोटात गेल्या अनेक दिवसांपासून मोठ्या घडामोडी घडत असून नेत्यांचे नाराजीचे सूर असो किंवा राजीनाम्यांचं सत्र असो अशा अनेक घडामोडी सतत सुरूच आहेत. दरम्यान आता भाजप नेते आणि पक्षाचे राष्ट्रीय प्रवक्ते शहजाद पूनावाला यांनी भाजपमधील आपल्या सर्व पदाचा राजीनामा दिला आहे. दरम्यान राजीनामा दिल्यानंतर त्यांनी एका वृत्तवाहिनीला दिलेल्या पहिल्या मुलाखतीमध्ये अनेक खुलासे केले आहेत. माझी आर्थिक परिस्थिती आणि वैयक्तिक जबाबदाऱ्यांमुळे मला हे पाऊल उचलावं लागलं आहे, असं या मुलाखतीमध्ये शहजाद पुनावाला यांनी म्हटलं आहे. महिन्याच्या एक तारखेलाच घरमालकाला घर भाडं हवं असतं, तो हे म्हणत नाही की, तुम्ही भाजपचे आहात की अजून कोणत्या पक्षाचे. भाजपच काय जगातील कोणताही पक्ष त्यांच्या कार्यकर्त्यांना सॅलरी देत नाही. त्यामुळे अशा स्थितीमध्ये पक्षासाठी 24 तास कार्य करणं शक्य नाही, असंही यावेळी पुनावाला यांनी म्हटलं आहे.
आता ही जबाबदारी मी सांभाळू शकत नाही, कारण आयुष्यात समोर जी परिस्थिती आहे, तिच्यापासून मी आता जास्त दिवस दूर राहू शकत नाही. माझ्यावर असलेल्या जबाबदाऱ्यांमुळे मी माझ्या आईची सेवा करू शकत नाहीये, तसेच माझी आर्थिक परिस्थिती आणि वैयक्तिक जबाबदाऱ्यांमुळे मी भाजपचा राजीनामा दिला आहे. कार्यकर्त्यांना पगार देणं हे भाजपच काय कोणत्याही पक्षाचं काम नाहीये, कारण तुम्हाला पक्षाचे विचार आवडतात, म्हणून तुम्ही त्यांच्यासाठी काम करत असतात, असंही यावेळी पुनावाला यांनी म्हटलं आहे.
दरम्यान तुम्ही पुन्हा काँग्रेसमध्ये जाणार का? असा सवालही यावेळी पुनावाला यांना विचारण्यात आला, यावर उत्तर देताना त्यांनी म्हटलं की मी काँग्रेसमध्ये जाईल, परंतु त्यासाठी एक अट आहे, ती म्हणजे तुम्हाला त्यासाठी राहुल गांधी, सोनिया गांधी आणि प्रियंका वाड्रा यांना हटवावं लागेल तसेच नेहरू यांनी ज्या काही चुका केल्या आहेत, त्याबद्दल माफी मागावी लागेल, असं पुनावाला यांनी म्हटलं आहे.
बुद्धिबळ खेळात वयाच्या 18 व्या वर्षी ग्रँडमास्टर किताब मिळवलेल्या नाशिकच्या विदित गुजराथीला अर्जुन पुरस्कार जाहीर झाला आहे. विदितनं आतापर्यंत बुद्धिबळ खेळात अनेक पदके पटकावली आहेत.
