मागच्या महिन्यात महाराष्ट्र विधानसभा निवडणुकीचे निकाल जाहीर झाले. या निकालाने सर्वात जास्त भ्रमनिरास कोणाचा झाला असेल, तर मनसैनिकांचा आणि राज ठाकरेंच्या समर्थकांचा , कारण निवडणूक प्रचारात मनसेची हवा दिसत होती. पण निकाल बिलकुल या उलट लागले. महाविकास आघाडीचा जितका मोठा दारुण पराभव झाला, त्याहीपेक्षा मोठा पराभव मनसेचा झाला.
विशेष म्हणजे सलग तिसरी विधानसभा निवडणूक आहे, ज्यात मनसेने इतकी खराब कामगिरी केलीय. 2009 च्या विधानसभा निवडणुकीचा अपवाद वगळता त्यानंतर झालेल्या तिन्ही विधानसभा निवडणुकीत मनसेला छाप पाडणारी कामगिरी करता आलेली नाही.
अशातच आता पक्षाध्यक्ष राज ठाकरे यांच्यासमोर खचून गेलेल्या मनसे कार्यकर्त्यांमध्ये उत्साह , जोश भरण्याच तसच कार्यकर्ते, पदाधिकारी टिकवून ठेवण्याच मोठं आव्हान आहे. त्यात आता कोकणातून मनसेला एक धक्का देणारी बातमी समोर आली आहे .
चिपळूण मनसेचे शहर प्रमुख अभिनव भुरण यांनी तडकाफडकी राजीनामा दिला आहे. पक्षातील स्थानिक राजकारणाला कंटाळून राजीनामा देत असल्याच त्यांनी सांगितलं.
स्थानिक पातळीवरील नेते विश्वासात घेत नसल्याचा त्यांचा आरोप आहे. पक्षातील पदाधिकाऱ्यांच्या अंतर्गत राजकारणाला कंटाळून राजीनामा दिल्याचं भुरण यांनी पत्रात म्हटलं आहे. वर्षानुवर्षे फक्त स्वतःचा फायदा करायचा आणि पक्षाला वाढवण्यासाठी स्थानिक नेतृत्व काम करत नसल्याचा ठपका त्यांनी ठेवला आहे.
