काही दिवसांआधीच दीनानाथ मंगेशकर रुग्णालयात पैशांअभावी वेळेवर उपचार न मिळाल्याने तनिषा भिसे या गर्भवती महिलेचा मृत्यू झाल्याची धक्कादायक घटना घडली. या घटनेला एक आठवडा उलटत नाही त्यातच आता आणखी एक धक्कादायक घटना समोर आली आहे. प्रसूती दरम्यान एका गर्भवती महिलेचा मृत्यू झाल्याची घटना घडली आहे.
बीड जिल्हा रुग्णालयात प्रसूती दरम्यान, मातेचा मृत्यू झाल्याचा धक्कादायक प्रकार उघडकीस आला आहे. छाया गणेश पांचाळ असे मयत महिलेचे नाव आहे. डॉक्टरांच्या हलगर्जीपणामुळे मृत्यू झाल्याचा आरोप नातेवाईकांनी केला आहे. तर प्रसूती व्यवस्थित करण्यासाठी २ हजारांची मागणी करण्यात आली, असा गंभीर आरोप मयतांच्या नातेवाईकांनी केला आहे. आठवडाभरातील माता मृत्यूची ही बीड जिल्हा रुग्णालयातील दुसरी घटना आहे त्यामुळे खळबळ उडाली आहेत.
तसेच रक्तस्त्राव होत असताना तिथल्या कर्मचाऱ्याला महिला कर्मचाऱ्याला उपचार करा, असे सांगितलं असता आम्ही सर्वजण निघून जातो, तुम्हीच तुमच्या पेशंटवर उपचार करा, असे उद्धट उत्तर तेथील डॉक्टरांनी दिल्याचे मयताच्या आईने सांगितले.
अतिरक्तस्त्राव सुरू झाल्यानंतर डॉक्टरांनी रक्त तपासणीसाठी पाठवले आणि त्यानंतर रक्ताची पिशवी मागवली. या संपूर्ण प्रक्रियेमध्ये दिरंगाई झाली आणि त्याच कालावधीत मातेचा मृत्यू झाला, असे सांगण्यात येते. या संपूर्ण प्रकरणाची चौकशी करून दोषींवर कारवाई करावी, अशी मागणी देखील नातेवाईकांनी केली.
नॉर्मल डिलिव्हरी करतो, चहापाण्याला पैसे द्या
'माझ्या पत्नीला उपचारासाठी बीडच्या रुग्णालयात दाखल करण्यात आले. प्रसूतीआधी दवाखान्यातील काही महिला कर्मचाऱ्यांनी प्रसूती व्यवस्थित करतो पण चहापाण्यासाठी काहीतरी द्या, असे म्हणत आमच्याकडे पैशांची मागणी केली. आम्ही त्यांना २ हजार देखील दिले. पण रात्री साडे अकरा वाजता प्रसूती झाली आणि पुढच्या काही वेळात माझी पत्नी मृ्त्यू पावली' असा गंभीर आरोप मयत महिलेचे पती गणेश पांचाळ यांनी केला आहे. माझ्या पत्नीच्या मृत्यूसाठी रुग्णालय प्रशासन जबाबदार आहे, असा आरोप त्यांनी केला.
नॉर्मल प्रसूती झाली. त्यानंतर रक्तस्राव सुरू झाला. कर्तव्यावर असलेल्या डॉक्टर आणि नर्स यांनी वेळेवर उपचार केले नाहीत तसेच रक्ताची पिशवी आणायला उशिरा सांगितली, असा आरोप केला आहे. तसेच एवढे सिरीयस पेशंट असताना वैद्यकीय अधिकाऱ्यांनी नातेवाईकांना बाहेरून रक्त आणायला का सांगितले? नॉर्मल डिलिव्हरीमध्ये एवढा रक्तस्त्राव कसा झाला? यासह अनेक प्रश्न मयत रुग्णाच्या नातेवाईंकांनी उपस्थित केले आहेत.
