हरियाणाच्या नुहमध्ये शुक्रवारी रात्रीच्या सुमारास मोठी दुर्घटना घडली. देवदर्शनाहून परतताना भाविकांच्या खासगी बसला भीषण आग लागली. या आगीत ८ भाविकांचा होरपळून मृत्यू झाला. तर डझनभर भाविक जखमी झाले. जखमींना उपचारासाठी रुग्णालयात दाखल करण्यात आलं आहे. अनेकांची प्रकृती चिंताजनक आहे.
याबाबत मिळालेल्या माहितीनुसार , अपघातातील मृत हे पंजाब आणि चंदीगड येथील रहिवासी असल्याचे सांगण्यात येत आहे. याप्रकरणी पोलिसांनी गुन्हा दाखल केला असून घटनेचा तपास सुरू केला आहे. अपघातग्रस्त मथुरा आणि वृंदावनला देवदर्शनाला गेली होती. मिळालेल्या माहितीनुसार, या बसमधून जवळपास ६० भाविक प्रवास करीत होते. हे सर्वच भाविक एकमेकांचे नातेवाईक होते.
दरम्यान, देवदर्शनाहून परतत असताना कुंडली मानेसर पलवल द्रुतगती मार्गावर धावत्या बसला अचानक आग लागली. बघता-बघता संपूर्ण बस आगीच्या विळख्यात सापडली.
जीव वाचवण्यासाठी काही भाविकांनी धावत्या बसमधून बाहेर उड्या घेतल्या. बसला लागलेली आग स्थानिकांनी विझवण्याचा प्रयत्न केला. मात्र, काहींना बाहेर पडता न आल्याने त्यांचा आगीत होरपळून मृत्यू झाला.
दरम्यान, स्थानिकांनी या घटनेची माहिती पोलिसांना दिली. घटनेची माहिती मिळताच अग्निशमन दलाचे जवान आणि पोलीस घटनास्थळी दाखल झाले. अथक प्रयत्नानंतर आग आटोक्यात आली. या घटनेत आतापर्यंत ८ भाविकांचा मृत्यू झाल्याचं वृत्त आहे. जखमींवर रुग्णालयात उपचार सुरू आहेत. आगीचे कारण अस्पष्ट आहे.
