पिंपरी-चिंचवड पोलिस आयुक्‍तालयाच्‍या हद्दीत सोमवारी एकाच दिवशी सात आत्‍महत्‍यांच्‍या घटनांची नोंद झाली आहे. शहरातील वाढत्‍या आत्‍महत्‍येच्‍या घटनांमुळे चिंता व्यक्त होत आहे. ही घटना चाकण पोलिस ठाण्‍याच्‍या हद्दीत सोमवारी सकाळी साडेदहा वाजताच्‍या सुमारास उघडकीस आली.
मिळालेल्या माहितीनुसार ,गौरव ज्ञानेश्‍वर अगम (वय २८) या तरुणाने भिंतीवरील लोखंडी ब्रॅकेटला ओढणीने गळफास घेऊन आत्महत्या केली. तर पुनावळे येथे प्रसाद संजय अवचट (वय ३१, रा. पुनावळे) या तरुणाने दुपारी साडेचार वाजताच्‍या सुमारास गळफास घेऊन आत्महत्या केली.
भोसरीमध्ये विकास रामदास मुरगुंड (वय ३५) या व्यक्तीने गणपत लांडगे चाळ, भोसरी येथे सकाळी पावणेदहाच्या सुमारास साडीच्‍या साह्याने गळफास घेतला. तर ही घटना सोमवारी दुपारी बारा वाजताच्‍या सुमारास उघडकीस आली. चौथ्‍या घटनेत मनाप्‍पा सोमल्‍या चव्‍हाण (वय ५२, रा. शिंदेवस्‍ती, नेरे, ता. मुळशी) या व्यक्तीने घराशेजारील लिंबाच्‍या झाडाला डोक्‍याच्‍या पटक्‍याने गळफास घेतला.
नवनाथ भगवान पवार (वय ४६, रा. पवार चाळ, दत्तनगर, थेरगाव) यांनी राहत्‍या घराच्‍या बेडरूममध्‍ये बेडशीटच्‍या साह्याने गळफास घेतला. ही घटना सोमवारी (२७ जानेवारी) मध्यरात्री पाऊण वाजण्या‍च्या सुमारास उघडकीस आली.
मात्र, मृत्‍यूचे नेमके कारण समजू न शकल्‍याने त्‍यांचा व्‍हिसेरा प्रयोगशाळेकडे पाठविण्‍यात आला आहे. आत्‍महत्‍येच्‍या सहाव्‍या घटनेत सुवर्णा श्रीराम पवार (वय ३६, रा. समीरा हाईट्स, ढोरेनगर, जुनी सांगवी) या महिलेने राहत्‍या घरात छताच्‍या पंख्‍याला गळफास घेऊन आत्महत्या केली. ही घटना सोमवारी (२७ जानेवारी) रात्री ११.५४ वाजताच्‍या सुमारास उघडकीस आली.
इमारतीवरून उडी मारून एका व्यक्तीने आत्महत्या केली आहे. दिनेश सुरेश लोखंडे (वय ४०, रा. चिखली) असे आत्महत्या केलेल्या व्यक्तीचे नाव आहे. ही घटना रविवारी (दि. २६) सायंकाळी पावणेआठच्‍या सुमारास घडली. आत्‍महत्‍येचे कारण समजू शकले नाही. मात्र, एकाच दिवसांत झालेल्या या सात घटनांमुळे अस्वस्थता पसरली. आत्महत्या केलेले विविध समाजघटकांतील, विविध वयोगटातील आहेत. त्यामुळे समाजातून चिंता व्यक्त करण्यात येत आहे.
