पुण्यात वेळेत उपचार न मिळाल्यानं गर्भवती महिलेचा मृत्यू झाल्याचा प्रकार समोर आलं आहे. ही महिला भाजप आमदार अमित गोरखे यांचे पीए सुशांत भिसे यांची पत्नी होती. दीनानाथ मंगेशकर हॉस्पिटल प्रशासनाच्या मुजोरपणामुळे त्यांचा मृत्यू झाल्याचा आरोप नातेवाईकांनी केला आहे. या महिलेवर उपचारांसाठी दीनानाथ हॉस्पिटल प्रशासनानं 10 लाखांची मागणी केली होती. 3 लाख भरण्याची तयारी असतानाही त्यांना हॉस्पिटलमध्ये दाखल करुन घेतलं नाही.
दरम्यान, या प्रकरणामुळे वातावरण तापलं आहे. दीनानाथ मंगेशकर रुग्णालयाने पैशांअभावी गर्भवती महिलेला उपचार नाकारल्याने संबंधित महिलेचा मृत्यू झाला आहे. या प्रकरणी आता दिनानाथ मंगेशकर रुग्णालयाबाहेर मोठं आंदोलन सुरू झालं आहे. मंगेशकर रुग्णालयाने पूर्ण पैसे न दिल्याने डिलिव्हरी करायला नकार दिल्यानंतर आता उबाठा गटाचे नेते आणि कार्यकर्त्यांनी आंदोलन सुरू केलं आहे. मंगेशकर रुग्णालयातील अधिकाऱ्यांच्या अंगावर चिल्लर फेकले आहेत.
पुणे महानगरपालिकेच्या आरोग्य विभागाकडून दीनानाथ हॉस्पिटलला कारणे दाखवा नोटीस देण्यात येणार आहे. महानगरपालिका आरोग्य प्रमुख नीना बोराडे नोटीस पाठवणार आहेत. आरोग्य उपसंचालकांनी स्थापन केलेल्या चार सदस्यीय समितीत निना बोराडे यांचा समावेश आहे. झालेल्या प्रकाराचा खुलासा दीनानाथ हॉस्पिटलकडून महानगरपालिका मागवणार आहे.
