पश्चिम बंगालची राजधानी असलेलं कोलकाता शहर एका महाविद्यालयात विद्यार्थिनीवर झालेल्या बलात्काराच्या घटनेनं हादरलं आहे. कोलकाता येथील एका लॉ कॉलेजच्या आवारामध्ये एका विद्यार्थिनीवर सामुहिक बलात्कार करण्यात आला असून, या प्रकरणी राज्यातील सत्ताधारी तृणमूल काँग्रेसच्या युवा कार्यकर्त्यासह तीन जणांना अटक करण्यात आली आहे.
याबाबत मिळालेल्या माहितीनुसार , कॉलेजचा माजी विद्याथी आणि हंगामी कर्मचारी मनोजित मिश्रा, प्रमित मुखर्जी आणि जेब अहमद अशी या आरोपींची नावं आहेत.दरम्यान, या बलात्कार प्रकरणातील पीडित तरुणीने दिलेल्या जबाबामधून धक्कादायक माहिती समोर आली आहे.
बलात्काराची ही घटना बुधवारी संध्याकाळी ७.३० ते १०.५० च्या सुमारास कॉलेजच्या आवारात घडली. या प्रकरणातील पीडित तरुणी ही कॉलेजच्या राजकीय विश्वात सक्रिय होती. तसेच ती तृणमूल काँग्रेसची समर्थक आहे.
तिने पोलिसांना सांगितले की, मी बुधवारी परीक्षेचा अर्ज भरण्यासाठी कॉलेजमध्ये गेले होते. इतर विद्यार्थी अर्ज भरल्यानंतर निघून गेले. मात्र मनोजित मिश्रा याने मला आणि इतर सात विद्यार्थ्यांना युनियनच्या खोलीत थांबण्यास सांगितले. तिथे मला त्यांनी बिस्किट दिले. तसेच युनियनमध्ये एका महत्त्वपूर्ण पदावर नियुक्ती करण्याचा प्रस्ताव दिला.
पीडित तरुणी पुढे म्हणाली की, मी कॉलेजच्या युनियनसाठी पूर्णपणे समर्पित आहे. तसेच यूनिटसाठी काम करण्यास तयार असल्याचे त्यांना सांगितले . त्यानंतर मनोजित मिश्रा मला युनियनच्या रूममधून बाहेर घेऊन गेला. तसेच त्याने माझ्यासमोर लग्नाची मागणी घातली. मात्र मी त्याची ही मागणी धुडकावून लावली.
त्यानंतर तो मला जबरदस्तीने सुरक्षा रक्षकांच्या खोलीत घेऊन गेला. तिथे मी त्याचा तावडीतून सुटका करण्यासाठी पुरेपूर प्रयत्न करत होते. मी त्याच्यासमोर हात जोडले. त्याचे पाय धरले. मला जाऊ देण्यासाठी विनवणी केली. मात्र त्याने मला जाऊ दिले नाही. त्याने मला जबरदस्तीने पकडले. मी तुझी मागणी स्वीकारू शकत नाही. माझा एक बॉयफ्रेंड आहे. तसेच मी त्याच्यावर प्रेम करते, असं मी त्याला सांगितलं. मात्र तो ऐकण्याच्या मनस्थितीत नव्हता, असेही पीडितेने सांगितले.
या प्रकरणी पोलिसांनी पीडितेची वैद्यकीय तपासणी केली असून, त्यामधून पीडितेवर बलात्कार झाल्याचे निष्पन्न झाले आहे. त्यानंतर पोलिसांनी मुख्य आरोपी मनोजित मिश्रा याच्यासह इतर दोघांना अटक केली आहे.
