शिवसेना नेमकी कुणाची ? हा प्रश्न उद्या अखेर निकाली लागणार आहे. उद्या म्हणजे ८ ऑक्टोबरला सुप्रीम कोर्टात महत्त्वाची सुनावणी पार पडणार आहे. गेल्या ३ वर्षांपासून शिवसेना ठाकरे गट आणि शिवसेना शिंदे गट या दोन्ही पक्षामध्ये शिवसेना नाव आणि चिन्ह यावरून मोठे वादंग पहायला मिळत आहे. सुप्रीम कोर्टात शिवसेना नाव आणि चिन्हाबाबत सुनावणी सुरू आहे. अखेर उद्या सुप्रीम कोर्टात याबाबत अंतिम सुनावणी होणार आहे. या निकालाकडे महाराष्ट्रासह अख्ख्या देशाचे लक्ष लागून आहे.
वकील असीम सरोदे यांनी सांगितले की, धनुष्यबाण चिन्हाबाबत उद्या अंतिम सुनावणी घेणार असे सर्वोच्च न्यायालयाने जाहीर केले आहे. दिनांक ८ ऑक्टोबरला न्यायाधीश सूर्यकांत नक्की सुनावणी घेतील अशी अपेक्षा आहे. इकडे पंतप्रधान नरेंद्र मोदी बांधून तयार नसलेल्या विमानतळाचे नवी मुंबईत दिखाऊ उद्घाटन करणार आणि त्याचवेळी संविधानासोबत अनैतिकता करून सत्तेच्या हवेत असलेल्या एकनाथ शिंदे यांचे विमान सर्वोच्च न्यायालय जमिनीवर पाडणार का? लवकरच कळेल असा खोचक टोला त्यांनी लगावला आहे.
आगामी स्थानिक स्वराज्य संस्थांच्या निवडणुका पुढील काही महिन्यात पार पडतील. त्याआधीच खरी शिवसेना कुणाची हा निकाल सुप्रीम कोर्ट देणार आहे. त्यामुळे धनुष्यबाण चिन्ह एकनाथ शिंदे यांच्याकडे कायम राहणार की ते पुन्हा उद्धव ठाकरे यांना मिळणार हे सुप्रीम कोर्टाच्या निकालानंतर स्पष्ट होणार आहे.
