बिहारमधील बक्सर जिल्ह्यात पंतप्रधान नरेंद्र मोदी यांच्या हत्येच्या कटाचे एक खळबळजनक प्रकरण उघडकीस आले आहे. पोलिसांनी २२ वर्षीय अमन तिवारीला अटक केली आहे. ज्याने अमेरिकेची गुप्तचर संस्था सीआयएला एक प्रस्ताव पाठवून मोठ्या रकमेची मागणी केली होती. बुधवारी (8 एप्रिल) रात्री उशिरा टाकलेल्या छाप्यात त्याच्यासह तिघांना अटक करण्यात आली. या घटनेमुळे संपूर्ण जिल्ह्यात खळबळ उडाली आहे.
पंतप्रधान कार्यालय (PMO) शी संबंधित संवेदनशील माहिती लीक केल्याप्रकरणी आणि त्याबदल्यात परदेशातून पैसे मागितल्याच्या प्रकरणात बक्सर पोलिसांनी मोठा खुलासा केला आहे. डुमराव उपविभागातील सिमरी पोलिस ठाण्याच्या हद्दीतील आशा पडरी गावात बुधवारी रात्री उशिरा छापा टाकून 3 जणांना अटक करण्यात आली आहे.
पोलिसांच्या माहितीनुसार, आरोपी परदेशात बसलेल्या संशयित लोकांशी संपर्क साधून केवळ गोपनीय माहिती शेअर करण्याबद्दलच बोलले नाही, तर 22 दिवसांच्या आत पंतप्रधानांवर हल्ला करण्याची आणि सुरक्षेत घुसखोरी करण्याची योजनाही आखली होती. प्रकरणाची माहिती मिळताच बक्सरचे एसपी शुभम आर्य यांच्या निर्देशानुसार विशेष पथक तयार करण्यात आले. पथकाने तात्काळ कारवाई करत आशा पडरी गावात छापा टाकला आणि तिन्ही आरोपींना अटक केली.
झडतीदरम्यान, अमनच्या खोलीतून एक लॅपटॉप आणि अनेक इलेक्ट्रॉनिक उपकरणे जप्त करण्यात आली. या उपकरणांची तांत्रिक तपासणी केली जात आहे. या उपकरणांमधून महत्त्वाचे धागेदोरे मिळू शकतील, असा पोलिसांना संशय आहे. पुराव्यांमध्ये फेरफार होण्याची शक्यता असल्याने खोली सील करण्यात आली आहे. तिथे पोलीसही तैनात करण्यात आले आहेत. फॉरेन्सिक तपासणीनंतर अधिक माहिती समोर येण्याची शक्यता आहे.
अमन तिवारीची गुन्हेगारी पार्श्वभूमी असल्याचेही तपासात उघड झाले आहे. २०२२ मध्ये त्याने कोलकाता विमानतळाचे नुकसान करण्याचा कट रचला होता. त्या काळात तो परदेशी लोकांशीही संपर्कात आला होता. मात्र, कोलकाता पोलिसांनी त्याला वेळेवर अटक केली. अल्पवयीन असल्याने तो गंभीर कारवाईतून बचावला. हे प्रकरण आता पुन्हा चर्चेत आले आहे.
