बँक व्यवहार हे सर्वात खात्रीशीर म्हणले जातात पण गेल्या अनेक महिन्यांपासून बँक घोटाळे समोर आले ज्यामुळे खातेदारांना मोठा फटका बसला आहे. आता पुन्हा एकदा बँकेचा मोठा घोटाळा समोर आला आहे. संगनमताने कट करून बोगस कर्जांच्या माध्यमातून फलटणमधील यशवंत को-ऑपरेटीव्ह बँकेत 112 कोटी 10 लाख 57 हजार रूपयांचा अपहार केल्याप्रकरणी भाजपच्या बड्या नेत्यावर गुन्हा दाखल करण्यात आला आहे.
भाजप नेते तथा सहकार परिषदेचे माजी अध्यक्ष शेखर चरेगावकर आणि फलटणचे माजी आमदार दिवंगत कृष्णचंद्र भोईटे यांचा मुलगा नरेंद्र भोईटे यांच्यासह संपूर्ण संचालक मंडळ, पाच वरिष्ठ अधिकारी आणि चरेगावकरांचा भाऊ, नातेवाईकांसह 50 जणांवर शनिवारी रात्री उशीरा कराड शहर पोलीस ठाण्यात गुन्हा दाखल झाला आहे. ११२ कोटींचा घोटाळा उघड झाल्यानंतर साताऱ्यात एकच खळबळ उडाली आहे.
पुण्यातील शासकीय सनदी लेखापाल मंदार देशपांडे यांनी याबाबत फिर्याद दिली. यशवंत को-ऑपरेटीव्ह बँकेत संगनमताने कट करून बोगस कर्जांच्या माध्यमातून ११२ कोटी १० लाख ५७ हजार रुपयांचा अपहार केल्याचा आरोप ठेवण्यात आला. एप्रिल २०२४ ते मार्च २०२५ या कालावधीत झालेल्या लेखापरीक्षण व एक एप्रिल २०१८ ते ३१ मार्च २०२४ अशा लेखापरीक्षण पूर्व कालावधीत कार्यरत असलेल्यांवर घोटाळ्याचा ठपका ठेवलाय.
आरोप काय ?
यशवंत बँकेचे अध्यक्ष, कर्मचारी व संचालकांनी स्वत:च्या लाभासाठी बँकेचे आर्थिक नुकसान केले. परस्पर संगनमताने ११२ कोटी १० लाख ५७ हजार ४८१ एवढ्या रकमेचा घोटाळा केला. त्यासाठी तब्बल तब्बल १९५ बोगस कर्ज खाती तयार करण्यात आली. कर्जास तारण न घेता हेतुपुरस्सर कर्ज वितरण करून जुनी थकीत खाती बंद दाखवून नवीन खाती उघडली. कागदपत्रांमध्ये फेरफार व खोट्या नोंदी तयार करून बँकेच्या निधीचा गैरविनियोग करून घोटाळा केला.
