प्रेमात कोण काय करेल सांगता येत नाही. सातारा जिल्ह्यामधील फलटण तालुक्यात घडलेली एक घटना तुमच्याही अंगावर काटा आणेल. अनैतिक संबंध, प्रेमाचा त्रिकोणी एँगल आणि त्यातून झालेल्या वादातून एका महिलेच्या पहिल्या प्रियकराने तिच्या नवऱ्याच्या मदतीने दुसऱ्या प्रियकराचा अत्यंत अमानुषपणे खून केल्याची धक्कादायक माहिती समोर आली आहे.
सातारा जिल्ह्यातील फलटण तालुक्यात एका २७ वर्षीय तरुणाचा अत्यंत अमानुष पद्धतीने खून करण्यात आला आहे. सतीश ऊर्फ आप्पा दादासो दडस असं हत्या झालेल्या तरुणाचे नाव आहे. या खुनानंतर मृतदेह लाकडे कापण्याच्या मशीनने तुकडे करून काही अवयव नदीत फेकून, उर्वरित मृतदेह शेतात पुरण्यात आल्याचे पोलिस तपासात निष्पन्न झाले आहे.या प्रकरणात मुख्य आरोपी असलेल्या महिलेसह तिचा पती लखन बुधावले आणि तिचा प्रियकर सतीश माने यांना फलटण ग्रामीण पोलिसांनी अटक केली आहे.
नेमकं काय घडलं ?
मृत सतीश दडस या तरुणाचे आरोपी महिलेशी अनैतिक संबंध होते. याच महिलेचे आणखी एका तरुणाशी अफेयर होते. सतिश या महिलेला ब्लॅकमेल करत होता त्यामुळे ती महिला वैतागली होती. १४ जानेवारी, मकर संक्रांतीच्या दिवशी अनैतिक संबंधातून मृत तरुणाचा आरोपी महिला, तिचा पती तसेच प्रियकरासोबत वाद झाला. या वादातून सतीश दडस याला लोखंडी रॉडने मारहाण करून गंभीर जखमी करण्यात आले.
तसेच दवाखान्यात नेतो असा बनाव करत त्याला विडणीच्या मांगोबा माळ परिसरात नेण्यात आले. तिथे त्याचा डोक्यात दगड घालून निर्घृणपणे खून करण्यात आला. इतकेच नव्हेतर लाकूड कापण्याच्या कटरने त्याच्या मृतदेहाचे तुकडे करण्यात आले. तुकडे करण्यात आलेले शरीर पोत्यात भरुन एक पोते शेततळ्यात टाकण्यात आले तर दुसरं पोते थेट नीरा नदीत फेकून देत पुरावे नष्ट करण्याचा प्रयत्न करण्यात आला.
२१ जानेवारी रोजी मृताच्या भावाने दिलेल्या बेपत्ता तक्रारीनंतर पोलिस तपासाला वेग आला. तांत्रिक आणि कौशल्यपूर्ण तपास करत फलटण ग्रामीण पोलिसांनी अवघ्या काही दिवसांत या तिघांच्या मुसक्या आवळल्या. अनैतिक संबंध, विश्वासघात आणि क्रौर या तिन्हींचं भीषण मिश्रण असलेला हा खून सध्या संपूर्ण सातारा जिल्ह्यात चर्चेचा विषय ठरत आहे.
