उत्तर प्रदेशच्या मेरठमधील मुस्कान रस्तोगीचे प्रकरण संपूर्ण देशात गाजले. मुस्कानने पतीची हत्या करुन त्याचा मृतदेह निळ्या ड्रममध्ये ठेवला होता. कोणालाही संशय येऊ नये म्हणून तिने तो ड्रम सिमेंटने देखील भरला होता. आता पुन्हा एकदा अशाच प्रकारचे निळ्या ड्रमचे धक्कादायक प्रकरण समोर आले आहे. एका मुलाने स्वतःच्याच वडिलांची हत्या करुन त्यांचा मृतदेह निळ्या ड्रममध्ये भरला. पोलिसांना फसवण्यासाठी या मुलाने वडिलांच्या बेपत्ता होण्याचा बनाव रचत तक्रार दाखल केली होती.
नेमकं प्रकरण काय ?
लखनऊच्या आशियाना परिसरात २१ वर्षांच्या मुलाने आपल्या वडिलांची लायसन्स्ड रायफलने हत्या केली. २१ वर्षीय अक्षत प्रताप सिंह, ज्याचा स्वभाव लहानपणापासूनच हट्टी होता. अक्षतची आई लहानपणीच निधन पावली होती, त्यानंतर तो अत्यंत हट्टी, जिद्दी आणि विद्रोही स्वभावाचा झाला. ४ वर्षांपूर्वीही त्याने नाराजी व्यक्त करत एक चिठ्ठी लिहून घर सोडले होते. अक्षतचे मन अभ्यासात अजिबात लागत नव्हते. त्याचे वडील मानवेंद्र सिंह (जे दारू आणि पॅथॉलॉजी लॅबचे मोठे व्यावसायिक होते) यांना मुलाने मेडिकलची पदवी घेऊन व्यवसाय सांभाळावा असे वाटत होते. या करिअर आणि अभ्यासाच्या दबावामुळे अक्षतच्या मनात इतकी तीव्र घृणा निर्माण झाली की, त्याने आपल्या वडिलांना मार्गातून हटवण्याचा कट रचला.
डीसीपी सेंट्रल विक्रांत वीर यांच्या मते, ही घटना २० फेब्रुवारीच्या सकाळची आहे. पोलिसांच्या चौकशीत अक्षतने गुन्हा कबूल केला की, त्याने वडिलांच्या डोक्यात लायसन्स्ड रायफलने गोळी मारून हत्या केली. सुरुवातीला त्याने मृतदेह कारमध्ये भरून गोमती नदीत फेकण्याचा विचार केला, पण वजन जास्त असल्याने तो अपयशी ठरला. त्यानंतर त्याने बाजारातून सुरा खरेदी केला आणि वडिलांच्या मृतदेहाला क्रूरपणे कापले. त्याने हात, पाय आणि डोके कापून वेगवेगळ्या ठिकाणी फेकले, तर धडाला स्लीपिंग बॅगेत भरून नीळ्या ड्रममध्ये लपवले.
अक्षतने पोलिसांना फसवण्यासाठी २० फेब्रुवारीलाच वडिलांच्या बेपत्ता होण्याची तक्रार दाखल केली. पोलिसांनी घरातील सदस्यांची बारकाईने चौकशी सुरू केली तेव्हा अक्षतच्या जबानीत विरोधाभास आढळला. सुरुवातीला त्याने हे सुसाइड असल्याचे सांगण्याचा प्रयत्न केला, पण पोलिसांनी कडक कारवाई केल्यावर त्याने सगळे सत्य उघड केले.
