सध्या लग्नसराई जोरात सुरू आहे. लग्नाच्या वरातीमध्ये सर्रासपणे डॉल्बीचा वापर केला जात आहे. डॉल्बीच्या दणदणाटामुळे अनेक वाईट घटना घडतांना दिसत आहे, अशातच पंढरपुरातून एक धक्कादायक बातमी समोर आली आहे. मुलाच्या लग्नाच्या वरातीत बापाचा दुर्दैवी मृत्यू झाल्याची घटना घडलीये. या दुर्दैवी घटनेमुळे हळदीच्या लग्नमंडपात शोककळा पसरली. तसेच संपूर्ण गाव हळहळ व्यक्त करत आहे.
मिळालेल्या अधिक माहितीनुसार, सुभाष देवमारे असे मयत पित्याचे नाव आहे. सुभाष देवमारे यांचा मुलगा अमित देवमारे या तरुणाचा आज दुपारी लग्न सोहळा आयोजित केला होता. दरम्यान काल रात्री डॉल्बीच्या दणदणाटामध्ये नवरदेवाची हळदीची वरात सुरू होती.
नवरदेवाची वरात छत्रपती शिवाजी महाराज चौकात पोहचली. वरात आल्यानंतर डॉल्बीच्या कर्कश आवाजामुळे वधू पिता सुभाष देवमारे हे जागेवरच कोसळले. त्यांना तातडीने येथील खासगी रूग्णालयात उपचारासाठी दाखल केले. उपचारादरम्यान देवमारे यांचा मृत्यू झाला.
डॉल्बिच्या कर्कश आवाज आणि दणदणाटामुळे मृत्यू झाल्याची चर्चा सुरू आहे. लग्नाच्या दिवशीच आपल्या वडिलांचा मृत्यू झाल्याने वराने टाहो फोडला. लग्नाघरातील आनंद अचानक दु:खाच्या छायेत बुडून गेला.
या घटनेनंतर कर्कश आवाज सोडून दणदणाट करणाऱ्या डॉल्बिवर तसेच नियमापेक्षा जास्त डेसिबल आवाज सोडणाऱ्या डॉल्बीवर कडक कारवाई करावी अशी मागणी केली जात आहे.
