पुणे जिल्ह्यातील लोणावळ्यात पर्यटक मोठ्या संख्येने भेट देत असतात. त्यामुळे येथे हॉटेल, बंगले मोठ्या प्रमाणात भाड्याने सुद्धा मिळतात. मात्र, अशाच प्रकारच्या एका बंगल्यात चक्क अश्लील चित्रपटाचे शूटिंग सुरू असल्याची धक्कादायक माहिती समोर आली आहे. लोणावळ्यातील बंगला भाड्याने घेऊन त्या ठिकाणी अश्लील चित्रपटाचं शूटिंग सुरू होते. या संदर्भातील माहिती मिळताच पोलिसांनी धाड टाकली.
नेमकं काय आहे प्रकरण?
पुण्याच्या ग्रामीण भागातील मळवली जवळील पाटण गावात एका खाजगी बंगल्यात अश्लील चित्रपटाचे चित्रीकरण सुरू होते. या प्रकरणाची माहिती मिळताच लोणावळा ग्रामीण पोलिसांनी या बंगल्यावर धाड टाकली. पोलिसांनी धाड टाकून घटनास्थळावरुन 6 लाख 72 हजार 620 रुपयांचा मुद्देमाल हस्तगत केला. यासोबतच तब्बल 18 आरोपींच्या विरोधात गुन्हा दाखल केला आहे. यात 5 महिलांचा देखील सहभाग आहे. शिवाय बंगला भाड्याने देणाऱ्या मालकाला आणि मध्यस्थीलाही यामध्ये आरोपी करण्यात आले आहे.
10 पुरुषांसह 5 महिलांना अटक
पाटण गावातील अर्णव व्हीला या ठिकाणी एका अश्लील चित्रपटाचे चित्रीकरण सुरू असल्याची माहिती लोणावळा ग्रामीण पोलिसांना मिळाली. त्यानंतर पोलिसांनी त्या ठिकाणी अचानक धाड टाकून चित्रीकरण सुरू असतानाच त्यांना रंगेहाथ पकडले. चित्रीकरणासाठी लागणारे दोन कॅमेरे, वेगवेगळे लाईट, स्टँड, वायर लेस माईक, लॅपटॉप असा मुद्देमाल ही जप्त केलाय.
या प्रकरणी लोणावळा ग्रामीण पोलिसांनी आरोपी विष्णू साओ (वय 30) , जावेद खान (वय 33), बुध्दसेन श्रीनिवास (वय 29), समीर आलम (वय 26), अनुप चौबे (वय 29), रामकुमार यादव (वय 21), राहुल नेवरेकर (वय 38), अनिकेत शर्मा (वय 19), वंशज वर्मा (वय 21), मनीष चौधरी (वय 20) यांच्यासह 5 महिला आरोपी आणि बंगला भाड्याने देणारे तसेच चालवणाऱ्या 3 जणांनाना ताब्यात घेतलं आहे. भारतात अश्लील फिल्म तयार करण्यास बंदी आहे. याविषयी गुन्हे दाखल करून खटला चालविण्याचे प्रवाधान कायद्यात आहे.
ताब्यात घेण्यात आलेल्यांमध्ये पाच तरुणींचा समावेश असून त्यांच्यावर देखील कारवाई केली जात असल्याचे पोलिसांनी सांगितले आहे. लोणावळा ग्रामीण उपविभागाचे सहाय्यक पोलीस अधीक्षक सत्यसाई कार्तिक यांच्या मार्गदर्शनाखाली ही कारवाई करण्यात आली. लोणावळ्या सारख्या पर्यटनस्थळी अशा प्रकारे बंगला भाड्याने घेऊन तेथे अश्लील चित्रपटाचे शूटिंग सुरू असल्याच्या वृत्ताने खळबळ उडाली आहे. या प्रकारानंतर बंगला भाड्याने देताना विशेष चौकशी करुनच भाड्याने देण्यात यावा अशी मागणी जोर धरु लागली आहे.
