माजी मंत्री धनंजय मुंडे आणि भाजपाचे आमदार सुरेश धस हे आज एकाच मंचावर येत आहे. मस्साजोगचे सरपंच संतोष देशमुख यांच्या अत्यंत क्रूर आणि माणुसकीला काळिमा फासणाऱ्या हत्येनंतर बीड जिल्ह्याचे सामाजिक, राजकीय समीकरणं पूर्णपणे बदलले. जिल्ह्यातील राजकारणाने जातीय कूस बदलली आहे.
त्यानंतर जिल्ह्यात अनेक नेत्यांच्या चेलेचपाट्यांचे दादागिरीचे व्हिडिओ धडाधड समाज माध्यमांवर व्हायरल झाले. देशमुख यांच्या प्रकरणात आमदार धस यांनी धनंजय मुंडे यांच्यावर गंभीर आरोप केले. मध्यंतरी दोन्ही नेत्यांमध्ये भेट सुद्धा झाली. पण बंद दाराआड झालेल्या या भेटीने धस यांना अडचणीत आणले होते. त्यानंतर धस पुन्हा आक्रमक दिसले. आता दोघे नेते एकाच मंचावर येत असल्याने सर्वांचे लक्ष्य लागले आहे.
मास्साजोगचे सरपंच संतोष देशमुख यांच्या निर्घृण हत्येनंतर माजी मंत्री धनंजय मुंडे आणि आमदार सुरेश धस यांच्यात कमालीचा संघर्ष निर्माण झाला होता. आज ते दोघेजण एका कार्यक्रमाचे निमित्त एकत्र येत आहेत .आज संत भगवान बाबा गडाचा नारळी सप्ताहाची सांगता शिरूर कासार तालुक्यातील पिंपळनेर या गावी होणार आहे. यावेळी महंत नामदेव शास्त्री यांच्या काल्याचे किर्तन आहे. या ठिकाणी दोन्ही नेते एकाच मंचावर येतील. आमदार सुरेश धस आणि धनंजय मुंडे हे दोघेही एकाच मंचावर येणार असल्याने राजकीय चर्चेला उधाण आले आहे.
दरम्यान या कार्यक्रमानंतर आमदार सुरेश धस आणि माजी मंत्री धनंजय मुंडे यांच्यात दिलजमाई होणार का? याची सध्या जिल्ह्यात चर्चा रंगली आहे.
