सोशल मीडियाची पॉवर इतकी जबरदस्त असते की , एखादी गोष्ट इतक्या झपाटयाने व्हायरल व्हायरल व्हायला क्षणाचाही अवधी लागत नाही. याच पॉवर चा प्रत्यय आता सध्या सोशल मीडियावर धुमाकूळ घालणाऱ्या ‘कॉकरोच जनता पार्टी’ मुळे आला आहे.
काय आहे 'कॉकरोच जनता पार्टी'?
सध्या देशभरात ‘कॉकरोच जनता पार्टी’ची सोशल मीडियावर जोरदार चर्चा सुरू आहे. सुरुवातीला लोकांनी याला निव्वळ एक गंमत किंवा ‘मीम‘ समजले होते, परंतु अवघ्या ५ दिवसांत या पार्टीने इन्स्टाग्रामवर १ कोटी फॉलोअर्सचा टप्पा पार करून इतिहास रचला आहे. फॉलोअर्सच्या शर्यतीत या डिजिटल पार्टीने भारतीय जनता पार्टीला (BJP) मागे टाकले असून, लवकरच ती काँग्रेसलाही मागे टाकण्याच्या तयारीत आहे. एका विधानावरून सुरू झालेली ही चळवळ आता सोशल मीडियावर प्रचंड ट्रेंड होत आहे.
या संपूर्ण प्रकरणाची सुरुवात सरन्यायाधीश सूर्यकांत यांच्या एका विधानामुळे झाली. एका सुनावणीदरम्यान बोलताना, “काही बेरोजगार तरुण झुरळांप्रमाणे व्यवस्थेवर हल्ला करतात. ते कायदा, प्रसारमाध्यमे आणि आरटीआयचळवळीसारख्या यंत्रणांमध्ये घुसखोरी करत आहेत,” अशी टिप्पणी त्यांनी केली होती. या विधानानंतर तरुणांमध्ये तीव्र संताप व्यक्त झाला. “हे विधान सामान्य बेरोजगार तरुणांसाठी नसून बनावट पदव्या घेणाऱ्यांसाठी होते,” असे स्पष्टीकरण नंतर सरन्यायाधीशांनी दिले; परंतु तोपर्यंत सोशल मीडियावर संतापाचा उद्रेक झाला होता.
दरम्यान, तरुणांचा अपमान झाल्यानंतर त्याचा निषेध करण्यासाठी एक अनोखी चळवळ उभी राहिली. मूळचे छत्रपती संभाजीनगरचे असणारे आणि सध्या अमेरिकेतील बोस्टन येथे पदव्युत्तरशिक्षण घेणारे अभिजीत दीपके यांनी या संतापाला एक डिजिटल रूप दिले. त्यांनी बोस्टनमध्ये बसूनच ‘कॉकरोच जनता पार्टी’ नावाने एक वेबसाईट, इन्स्टाग्राम हँडल आणि एक्स (ट्विटर) खाते सुरू केले. बघता बघता देशातील लाखो तरुण या मोहिमेत सामील झाले.
“सरन्यायाधीशांचे वक्तव्य तर फक्त एक निमित्त होते. तरुणांच्या मनात अनेक वर्षांपासून साचलेला राग या माध्यमातून बाहेर आला आहे. आजच्या नव्या पिढीला हिंदू-मुस्लिम किंवा जातीपातीचे राजकारण नको आहे. आम्हाला दर्जेदार शिक्षण, रोजगार आणि नवनवीन तंत्रज्ञान हवे आहे” असे अभिजीत दीपके यांचे म्हणणे आहे.
