अभिनेता रणवीर सिंग हा’लालबागचा राजा’च्या दर्शनासाठी आला होता, यावेळी त्याने एक मोठी घोषणा देखील केली आहे. रणवीर नुकताच गणरायाच्या चरणी लीन झाला. मुंबईत सध्या गणेशोत्सवाची धामधूम असून या दरम्यान रणवीरने विख्यात ‘लालबागचा राजा’चे दर्शन घेऊन आशीर्वाद घेतलं. एवढंच नव्हे तर तिथे त्याने मोठी घोषणाही केली. रणवीर सिंगने 1 हजार मुलींच्या शिक्षणाचा खर्च उचलण्याचा संकल्प केला.
अभिनेता रणवीर सिंगसाठी हे वर्ष खरोखरच खूप खास ठरलं आहे. ‘धुरंधर’ या चित्रपटाच्या दोन्ही भागांना मिळालेला प्रचंड प्रतिसाद, मोठं यश यापासून ते पत्नी दीपिका पदुकोणच्या दुसऱ्या गरोदरपणापर्यंत, त्याच्या आयुष्यात बऱ्याच मोठ्या घडामोडी घडत आहेत. या सर्वच गोष्टींबद्दल आभार मानण्यासाठी रणवीर गणरायाच्या चरणी लीन झाला.
अभिनेता रणवीर सिंग हा’लालबागचा राजा’च्या दर्शनासाठी आला होता, तिथे त्याने मनोभावे प्रार्थना करून आशीर्वाद घेतले. बाप्पाच्या दर्शनानंतर आणि प्रार्थना केल्यानंतर त्याने प्रसारमाध्यमांशीही संवाद साधला. ” इथे येऊन खूप छान वाटतंय. बाप्पाच्या कृपेने, गेल्या वर्षभरात माझ्या आणि माझ्या कुटुंबाच्या आयुष्यात खूप आनंद आला. त्यामुळेच, त्यांचे दर्शन घेण्यासाठी, त्यांचे आभार मानण्यासाठी आणि पुढील प्रवासासाठी—म्हणजेच आयुष्याच्या प्रवासासाठी—त्यांचा आशीर्वाद घेण्यासाठी मी इथे आलो आहे” असं रणवीरने नमूद केलं.
गणेशोत्सवादरम्यान रणवीर सिंगने आणखी पुढाकार घेऊन एका उत्तम कार्याची सुरूवात करणार असल्याची घोषणा केली. ” गणेश चतुर्थी आणि आपले आदरणीय पंतप्रधान श्री. नरेंद्र मोदी यांच्या वाढदिवसाच्या शुभप्रसंगी, ‘सेवा संकल्प अभियाना’त सहभागी होऊन 1 हजार मुलींच्या शिक्षणाला पाठिंबा देण्याचा मी संकल्प करत आहे. यामुळे बाप्पा प्रसन्न होतील आणि त्यांचा आशीर्वाद सदैव आपल्यावर राहील,” अशी आशाही रणवीरने यावेळी व्यक्त केली,
