दारूच्या नशेत महिलेला मारहाण आणि शिवीगाळ करणाऱ्या व्यक्तीने रागाच्या भरात घर पेटवून दिल्याचा धक्कादायक प्रकार बोरीवलीच्या गोराई परिसरातून समोर आला आहे.
मिळालेल्या माहितीनुसार , आरोपीला बोरीवली पोलिसांनी अटक केली असून तो रेकॉर्डवरील गुन्हेगार असल्याचे समोर आलं आहे. या घटनेत महिलेचे घर जळून खाक झालं असून मोठ्या प्रमाणात नुकसान झालं आहे. आरोपीवर कठोर कारवाईसह महिलेने भरपाईची मागणी केली आहे.
पोलीस या प्रकरणाचा सखोल तपास करत आहेत. बोरीवलीच्या गोराई परिसरात एका आरोपीने महिलेच्या घरावर पेट्रोल शिंपडून पेटवून दिल्याची धक्कादायक घटना समोर आली.
ही घटना बोरिवली पश्चिमेतील गोराई येथील भीमनगर परिसरात घडली. भांडणानंतर आरोपीने १ एप्रिल रोजी पहाटे अडीच वाजता महिलेचे घर पेटवून दिले. सुदैवाने घरात कोणीही नव्हतं. या घटनेनंतर पोलिसांनी आरोपीला अटक केली.
याबाबत पोलिसांनी दिलेल्या माहितीनुसार, ३१ मार्च रोजी रात्री ११ वाजण्याच्या सुमारास भांडणाला सुरुवात झाली. विशाल उधमले असे आरोपीचे नाव असून तो रस्त्यावर खुर्चीवर बसून येणाऱ्या जाणाऱ्यांचा रस्ता अडवत होता.
यावेळी पीडित महिलेने त्याला रस्त्यातून खुर्ची बाजूला काढ असं सांगितले. यावरून दोघांमध्ये वाद सुरू झाला. प्रकरण इतके वाढले की ते शिवीगाळ करण्यापर्यंत पोहोचले आणि आरोपी विशाल संतापून तिथून निघून गेला.
विशाल दुसऱ्या दिवशी पहाटे पेट्रोलची बाटली घेऊन परतला आणि महिलेच्या घरावर ओतून पेटवून दिले. ही संपूर्ण घटना तिथल्या सीसीटीव्ही कॅमेऱ्यात कैद झाली असून त्यात विशाल आग लावताना स्पष्टपणे दिसत आहे.
आग लावल्यानंतर आरोपी विशालने आजूबाजूच्या लोकांना धमकावले आणि कोणी पोलिसांना सांगितले तर त्याचे गंभीर परिणाम भोगावे लागतील, असं धमकावले. त्यामुळे परिसरात भीतीचे वातावरण निर्माण झालं होतं.
महिलेने दिलेल्या तक्रारीच्या आधारे पोलिसांनी विशालविरुद्ध भारतीय दंड संहितेच्या संबंधित कलमांतर्गत गुन्हा दाखल करून त्याला अटक केली आहे.
प्राथमिक पोलिस तपासात आरोपी हा त्याच्या सासरी आला होता आणि महिलेने अडवल्याने त्याला अपमानास्पद वाटले. रागाच्या भरात त्याने हे धक्कादायक कृत्य केले.
