मागील काही दिवसांपासून राज्यातील वातावरणात कमालीचे बदल होताना दिसत आहेत. मार्च महिन्यातही उकाड्या नंतर अचानक अवकाळी पावसाने राज्यात धुमाकूळ घातला. त्यामुळे शेतकऱ्यांना मोठे नुकसान सहन करावे लागले आहे. दरम्यान आता या अवकाळी नंतर आता राज्यावर नवं संकट घोंगावत असल्याची माहिती हवामान विभागाने दिली आहे.
आता राज्यातील तापमानात चांगलीच वाढ होताना दिसून येत आहे. विदर्भातील काही जिल्ह्यांतील तापमान हे 43 ते 44 अंश सेल्सिअसपर्यंत जाण्याची शक्यता असल्याचं हवामान विभागानं सांगितलंय. पाहुयात 6 एप्रिलला राज्यातील काही प्रमुख शहरांमध्ये तापमान आणि हवामानाची स्थिती कशी असेल.
कोकण विभागातील पालघर, ठाणे, मुंबई, रायगड, रत्नागिरी, सिंधुदुर्ग या सर्व जिल्ह्यांत उष्ण आणि दमट वातावरण राहण्याची शक्यता असल्याचं हवामान विभागानं सांगितलंय. 6 एप्रिलला मुंबईतील कमाल तापमान 36 अंश सेल्सिअस तर किमान तापमान 26 अंश सेल्सिअस इतके असण्याची शक्यता आहे. त्याठिकाणी मुख्यतः निरभ्र आकाश राहून वातावरण दमट आणि उष्ण राहण्याची शक्यता आहे. पुढील 2 दिवसांत मुंबईतील तापमानात वाढ होणार असल्याची माहिती हवामान विभागानं दिली आहे.
नागपूरमधील कमाल तापमान 38 अंश सेल्सिअस तर किमान तापमान 22 अंश सेल्सिअस इतके असण्याची शक्यता आहे. 6 एप्रिलला त्याठिकाणी अंशतः ढगाळ वातावरण असू शकतं. नागपूरमधील तापमानात पुढील काही दिवसांत वाढ होऊन ते 41 अंश सेल्सिअस पर्यंत जाण्याची शक्यता आहे. त्याचबरोबर विदर्भातील अकोला, बुलढाणा या जिल्ह्यातील तापमानात चांगलीच वाढ होणार असल्याची माहिती हवामान विभागानं दिली आहे.
राज्यातून पावसाचे वातावरण गायब होऊन आता सर्वत्र तापमानाचा पारा वाढतांना दिसून येत आहे. त्याचबरोबर काही ठिकाणी दमट वातावरण निर्माण होण्याची देखील शक्यता आहे. वातावरणात पुन्हा अचानक बदल होत असल्याने नागरिकांनी आरोग्याची विशेष काळजी घेणे आवश्यक आहे.
