दैनिक भ्रमर : प्रेमात आलेला विरह अनेकांना सहन होत नाही त्यातून तरुण किंवा तरुणी टोकाचं पाऊल उचलतात. जीव देतात किंवा जीव घेतात. ज्यामुळे संपूर्ण कुटूंबच या प्रेमाच्या विरहाचे शिकार बनतं. असाच एक खळबळजनक प्रकार नागपूर येथे समोर आला आहे. लग्नाची मागणी नाकारल्याच्या रागातून प्रियकराने आपल्या प्रेयसीच्या गळ्यावर चाकूने वार करून तिला गंभीर जखमी केल्याची घटना खापरखेडा पोलीस ठाण्याच्या हद्दीतील गुमथी गावात घडली.
रोशन सोनेकर (32) आणि पीडित तरुणी (20) हे दोघेही गुमथी गावचेच. दोघांमध्ये प्रेमसंबंध होते. दरम्यान, रोशनचे एका अन्य मुलीसोबत लग्न झाले. मात्र लग्नानंतर प्रेयसीने रोशनच्या पत्नीला भेटून, “मीच रोशनसोबत लग्न करणार,” असे सांगितले. त्यामुळे रोशनने 2023 मध्ये पत्नीला घटस्फोट दिला. मात्र, नंतर प्रेयसीने रोशनसोबत लग्नास स्पष्ट नकार दिला. यावरून दोघांमध्ये अनेकदा वाद झाले. आणि हे प्रकरण थेट पोलीस ठाण्यापर्यंत पोहोचले आणि रोशनविरुद्ध विनयभंगाचा गुन्हा नोंदवण्यात आला.
या सर्व प्रकारामुळे रोशन मनात प्रचंड राग धरून होता. गुरुवारी गुमथी गावातील हनुमान मंदिरात पीडित मुलगीपूजा करत असताना, मंदिरातच हनुमान मूर्तीसमोर रोशनने तिच्या गळ्यावर धारदार शस्त्राने वार केला.घटनेनंतर गावकऱ्यांनी तिला तातडीने रुग्णालयात दाखल केले. खापरखेडा पोलिसांनी तत्काळ कारवाई करत आरोपी रोशन सोनेकरला अटक केली असून, पुढील तपास सुरू आहे. या घटनेने परिसरात एकच खळबळ उडाली आहे.
