सध्या भाजपच्या गोटात मोठ्या घडामोडी घडत असून भाजपच्या नेत्यांचा नाराजीचा सूर पाहायला मिळत असून आता भाजपमधून एक मोठी बातमी समोर येत आहे. भाजपाला मोठा धक्का बसला आहे. अखेर भाजपचे राष्ट्रीय प्रवक्ता शहजाद पूनावाला यांनी अखेर पक्षाच्या सदस्यत्वाचा तसेच प्रवक्तेपदाचा राजीनामा देत असल्याची घोषणा केली आहे. त्यांनी भाजपचे राष्ट्रीय अध्यक्ष नितीन नबीन यांना एक पत्र लिहून आपण पक्ष सोडत असल्याची माहिती दिली आहे. तसेच माझा राजीनामा स्वीकार करावा अशी विनंती देखील त्यांनी यावेळी नितीन नबीन यांना केली आहे. शहजाद पूनावाला हे भाजप सोडणार असल्याची चर्चा गेल्या अनेक दिवसांपासून सुरू होती. मात्र त्यांनी अधिकृतरित्या पक्षाचा राजीनामा दिला नव्हता, परंतु आता त्यांनी अधिकृतरित्या आपण भाजप सोडत असल्याची घोषणा केली आहे. मी जरी पक्ष सोडणार असलो तरी पक्षाची विचारधारा सोडणार नसल्याचं त्यांनी आपल्या पत्रामध्ये म्हटलं आहे.
शहजाद पूनावाला यांनी सोमवारी ट्विटरवर आपलं राजीनामा पत्र पोस्ट केलं आहे. ज्यामध्ये त्यांनी आपल्या 30 जुलै 2026 च्या एका पत्राचा संदर्भ दिला आहे. त्या पत्रात मी माझ्या वैयक्तिक आणि आर्थिक कारणांमुळे पक्षाचा राजीनामा देण्याची तयारी दर्शवली होती, परंतु पक्षाने माझा राजीनामा स्वीकारला नाही, मला विचार करण्यासाठी वेळ दिला, हा माझ्यासाठी अत्यंत भावुक करणारा क्षण होता, असं या पत्रामध्ये पूनावाला यांनी म्हटलं आहे.
दरम्यान पूनावाला यांनी आपल्या पत्रात पुढे म्हटलं आहे की, परंतु मी आता खूप विचार केला आहे. मी आता निर्णय घेतला आहे. मी भाजपच्या सदस्यत्वाचा तसेच प्रवक्तेपदाचा राजीनामा देत आहे. मी जरी पक्ष सोडत असलो तरी पक्षाची विचारधारा कधीही सोडणार नाही, कृपया माझा राजीनामा स्वीकार करावा. गेल्या काही दिवसांमध्ये ज्या काही घटना घडल्या, ज्या व्यक्तींबद्दल तुम्हाला मी सविस्तर सांगितले आहे, त्यांनीच मला माझ्या निर्णयावर ठाम राहण्यास आता भाग पाडलं आहे, त्यामुळे मी राजीनामा देत आहे, असं शहजाद पूनावाला यांनी म्हटलं आहे. यावेळी पूनावाला यांनी पंतप्रधान नरेंद्र मोदी, केंद्रीय गृहमंत्री अमित शाह आणि नितीन नबीन यांचे देखील आभार मानले आहेत.
