नवी दिल्ली : भारतीय क्रिकेट संघाचा अनुभवी लेगस्पिनर युजवेंद्र चहलचा भारताच्या विश्वचषक संघात समावेश करण्यात आलेला नाही. त्याचबरोबर संघातून वगळल्यानंतर चहलने आता मोठे पाऊल उचलले आहे.
BCCI ने आशिया चषक २०२३ दरम्यान भारतीय क्रिकेट संघाचा विश्वचषकासाठीचा संघ जाहीर केला आहे. ५ सप्टेंबर रोजी कर्णधार रोहित शर्मा आणि मुख्य निवडकर्ता अजित आगरकर यांनी पत्रकार परिषदेत विश्वचषक स्पर्धेत खेळणाऱ्या १५ खेळाडूंचा संघ जाहीर केला. हा संघ जवळपास आशिया कप संघासारखाच आहे.
या संघात केवळ युवा खेळाडू तिलक वर्मा आणि प्रसिद्ध कृष्णा यांचा समावेश नव्हता. पण महत्त्वाची गोष्ट म्हणजे टीम इंडियाचा अनुभवी फिरकीपटू युजवेंद्र चहलला पुन्हा एकदा संघातून वगळण्यात आले आहे. विश्वचषक संघात त्याचा समावेश करण्यात आला नाही. चहलच्या जागी त्याचा सहकारी खेळाडू कुलदीप यादवला पसंती देण्यात आली. मात्र, आता विश्वचषक संघात निवड न झाल्याने चहलने एक मोठे पाऊल उचलले आहे.
युजवेंद्र चहल आता प्रथमच काऊंटी क्रिकेट खेळताना दिसणार आहे. एका वृत्त संस्थेने दिलेल्या वृत्तानुसार, फिरकीपटू युझवेंद्र चहल काऊंटी क्रिकेटमध्ये केंटकडून खेळणार आहे. बीसीसीआयच्या सूत्रांनी सांगितले की, 'केंट काउंटी क्रिकेट क्लब याबाबत लवकरच अधिकृत घोषणा करेल. चहल त्यांच्यासाठी तीन ते चार वनडे खेळणार आहे. बीसीसीआयने त्याला काउंटी क्रिकेट खेळण्यासाठी एनओसी दिली आहे. भारतीय संघाला त्याची गरज भासल्यास चहल लगेच राष्ट्रीय संघात सामील होईल.':
काय म्हणाला चहल??
भारतासाठी १२१ एकदिवसीय आणि ९६ टी-२० आंतरराष्ट्रीय विकेट्स घेतलेल्या युझवेंद्र चहलने या काऊंटी संघाच्या निवेदनात म्हटले आहे की, 'इंग्लिश काऊंटी क्रिकेटमध्ये खेळणे हे माझ्यासाठी एक रोमांचक आव्हान आहे आणि मी त्याबद्दल खूप उत्साहित आहे.' तो केंटचे प्रतिनिधित्व करणारा दुसरा भारतीय खेळाडू असणार आहे. वेगवान गोलंदाज अर्शदीप सिंगने जून-जुलैमध्ये केंटसाठी पाच सामने खेळले ज्यात त्याने १३ विकेट घेतले.
चहलने २०२३ मध्ये फक्त २ एकदिवसीय सामने खेळले असून ३ विकेट्स घेतल्या आहेत. ३३ वर्षीय खेळाडूने ७२ एकदिवसीय सामन्यांमध्ये १२१ विकेट्स आणि ८० टी-२० मध्ये ९६ विकेट घेतल्या आहेत. TOI शी बोलताना चहल म्हणाला की मला आशा आहे की भारतीय संघात पुनरागमन करण्यासाठी त्याला जास्त काळ वाट पाहावी लागणार आहे.
