अलीकडच्या काही महिन्यांत,अनेक भारतीय क्रिकेटपटूंनी निवृत्तीची घोषणा केली. जसे की, विराट कोहली, रोहित शर्मा आणि रविचंद्रन अश्विन, चेतेश्वर पुजारा यांनी आपल्या निवृत्तीची घोषणा केली. बीसीसीआयने आपल्या माजी खेळाडूंसाठी पेन्शन योजना सुरु केली होती. या योजनेअंतर्गत, आंतरराष्ट्रीय आणि देशांतर्गत स्तरावर सामने खेळणाऱ्या खेळांडूना प्रत्येक महिन्याला एक निश्चित रक्कम पेन्शन म्हणून देते.
दरवर्षी पेन्शनमध्ये वाढ केली जात नाही, परंतु बीसीसीआय वेळोवेळी या रक्कमेमध्ये बदल करत असते. बीसीसीआयच्या पेन्शन योजनेत वय देखील महत्त्वाची भूमिका बजावते, खेळाडूचे वय वाढत असताना पेन्शनच्या रकमेत वाढ होते. उदाहरणार्थ, एकदा खेळाडूचे वय ६० वर्षे ओलांडले की, त्यांच्या पेन्शनची रक्कम वाढवली जाते.
ज्या क्रिकेटपटूंनी भारतासाठी आंतरराष्ट्रीय सामने खेळले आहेत किंवा दीर्घकाळ देशांतर्गत क्रिकेटमध्ये योगदान दिले आहे, तेच खेळाडू या योजनेचा लाभ घेऊ शकतात. यामध्ये महिला क्रिकेटपटूंना देखील पेन्शनचा लाभ मिळतो.
किती मिळते पेन्शन?
गेल्या काही वर्षांमध्ये बीसीसीआयने खेळाडूंच्या पेन्शनमध्ये लक्षणीय वाढ केली आहे. कसोटी क्रिकेट खेळणाऱ्या खेळाडूंची पेन्शन दरमहा ३७,५०० रुपयांवरुन ६०००० रुपये करण्यात आली आहे. तर फर्स्ट क्लास क्रिकेट खेळणाऱ्या खेळाडूंची पेन्शन दरमहा १५००० रुपयांवरुन ३०००० रुपये करण्यात आली आहे. याशिवाय, ज्या वरिष्ठ खेळाडूंना आधी दरमहा ५०००० पेन्शन मिळत होती, आता त्यांना ७०००० रुपये मिळणार आहे.
