वसई तालुक्यातील कोपर गावातील अवघ्या 27 वर्षीय क्रिकेटपटूचा खेळपट्टीवरच हृदयविकाराच्या झटक्याने मृत्यू झाल्याची दुर्दैवी घटना घडली आहे. या घटनेने क्रिकेटविश्वावर शोककळा पसरली असून , सर्वत्र हळहळ व्यक्त होत आहे.
मिळालेल्या माहितीनुसार , सागर वझे असे या खेळाडूचे नाव होते. शुक्रवारी सायंकाळी खेळत असताना, सलग तिसरा षटकार मारण्याच्या प्रयत्नात असताना, सागरला हृदयविकाराचा तीव्र झटका आला आणि तो जागीच कोसळला. सागरच्या अकाली मृत्यूमुळे, मैदानात खेळत असताना हृदयविकाराचा झटका येण्याच्या घटनांविषयी चिंता वाढली आहे. खेळ आणि तंदुरुस्ती यावर भर दिला जात असतानाच, अशा घटनांमुळे खेळाडूंनी आरोग्याबाबत जागरूक राहणे किती महत्त्वाचे आहे हे अधोरेखित होते.
सागर वझे हा एक उत्कृष्ट खेळाडू होता. त्याची पंचक्रोशीत एक चांगला खेळाडू म्हणून ओळख होती. त्याच्या अकाली जाण्याने, केवळ त्याचे कुटुंबिय आणि मित्र परिवारच नाही तर, संपूर्ण क्रिकेटविश्व हळहळले आहे.
