राज्यसरकारकडून जनहितासाठी नेहमीच नवनवीन उपक्रम राबविले जातात. नागरिकांची तारांबळ होऊ नये तसेच नागरिकांसाठीच्या सोयी सुविधा त्यांना सहजतेने उपलब्ध व्हाव्या यासाठी राज्यसरकार प्रयत्नशील असून त्या अनुषंगाने महत्वाचे निर्णय घेतले जातात. दरम्यान आता महाराष्ट्र सरकारने नवा उपक्रम आणला आहे.
राज्य सरकारच्या अनेक योजनांची सेवा सरकारने व्हॉट्सअॅपवर उपलब्ध करून दिली आहे. सरकारी सेवेसाठी सरकारी कार्यालयात जाण्याची गरज भासणार नाही. व्हॉट्सअ ॅपवरील चॅटबॉटच्या माध्यमातून या सेवा उपलब्ध करून देण्याचा निर्णय राज्य सरकारने घेतला आहे. 'आपले सरकार' संकेतस्थळाच्या 500 सेवा व्हॉट्सअॅपच्या माध्यमातून उपलब्ध होणार आहेत, असा दावा मुख्यमंत्री फडणवीस यांनी केला आहे. मुख्यमंत्री देवेंद्र फडणवीस यांनी मुंबई टेक वीक 2025 या कार्यक्रमात या महत्त्वाच्या घटनांची माहिती दिली. हा चॅटबॉट मराठी, हिंदी आणि इंग्रजी भाषेत सेवा देईल. नागरिकांना त्यांच्या सरकारी चॅटबॉट्सशी लेखी संदेश किंवा रेकॉर्ड केलेल्या संदेशांद्वारे संवाद साधता येणार आहे.
कोणत्या सेवा पुरवल्या जाणार ?
वयाचा दाखला,राष्ट्रीयत्व व रहिवासी दाखल, उत्पन्नाचा दाखला, तात्पुरता रहिवासी दाखला, ज्येष्ठ नागरिक दाखला, सांस्कृतिक कार्यक्रम परमिट, शेतकरी दाखला, नॉन क्रिमिलर प्रमाणपत्र, जातीचा दाखला, जन्म-मृत्यू दाखला, विवाह नोंदणी प्रमाणपत्र, दारिद्र्य रेषेखालील दाखला, दुकान-आस्थापना नोंदणी, कारखाना नोंदणी, मोटार नोंदणी, दस्त नोंदणी, सहकारी संस्था नोंदणी, साऊंड रेकॉर्डर परवाना इत्यादी.
राज्य सरकार, महापालिका किंवा ग्रामपरिषदेकडून कागदपत्रे मिळवायची असतील, तक्रार दाखल करायची असेल, बसचे तिकीट बुक करायचे असेल किंवा कोणत्याही कामाचा पाठपुरावा करायचा असेल, तर कार्यालयात जाण्याची गरज नाही. मोबाइलवर मेसेज पाठवल्यास तुमचे काम पूर्ण होईल.
