स्थानिक स्वराज्य संस्थांच्या निवडणूका लवकरच होणार आहे. त्यामळे राजकीय पक्षांनी मोर्चेबांधणीस सुरुवात केली आहे. दरम्यान पक्षांतरांचे सत्र सुरूच आहे.
भाजप आणि काँग्रेसला मोठा धक्का बसला असून शिंदेच्या शिवसेनेची मात्र मोठी ताकद वाढली आहे. जळगाव जिल्ह्यातील अमळनेर विधानसभा मतदारसंघाचे माजी आमदार शिरीष चौधरी आणि हिंगोली विधानसभा मतदारसंघाचे काँग्रेसचे माजी आमदार हरीभाऊ पाटील गोरेगावकर यांनी आज शिवसेनेत प्रवेश केला. शिवसेना मुख्य नेते एकनाथ शिंदे यांच्या प्रमुख उपस्थितीत हा पक्षप्रवेश सोहळा पार पडला.
हिंगोली विधानसभा मतदारसंघाचे काँग्रेसचे माजी आमदार हरीभाऊ पाटील गोरेगावकर यांच्यासह माजी जिल्हा परिषद उपाध्यक्ष सुनील पाटील गोरेगावकर, माजी कृषी उत्पन्न बाजार समिती सभापती कांतराव हराळ, माजी शिक्षण सभापती भय्या देशमुख, माजी सभापती बाजीराव जुमडे, माजी उपसभापती मदन इंगोले, डॉ.आर.जी.कावरजे, द्वारकादास सारडा, न्यानोबा कवडे आणि असंख्य पदाधिकाऱ्यांनी शिवसेनेमध्ये प्रवेश केला आहे. त्यामुळे हिंगोलीतही शिवसेनेची ताकद वाढली आहे.
गेल्या काही निवडणुकांमध्ये माजी अपक्ष आमदार शिरीष चौधरी यांचा भाजपला पाठिंबा होता. त्यामुळे आता अमळनेरमध्ये भाजपला मोठा धक्का बसला आहे. चौधरी स्थानिक कार्यकर्त्यांच्या राजकारणाला कंटाळून शिवसेनेत प्रवेश केल्याचे समोर आले आहे. चौधरी यांच्यासह उबाठा गटाचे अमळनेरचे माजी नगरसेवक गुलाब पाटील, माजी शहरप्रमुख प्रवीण पाठक, माजी प्रभारी नगराध्यक्ष अनिल महाजन, माजी सभापती श्रीराम चौधरी, माजी सभापती देविदास महाजन, माजी नगरसेवक पंकज चौधरी, महेश जाधव, किरण बागुल, बाळासाहेब संघनाशिव, साखरलाल महाजन आणि इतर असंख्य पदाधिकाऱ्यांनी हाती भगवा घेत शिवसेनेमध्ये प्रवेश केला. त्यामुळे स्थानिक स्वराज्य संस्थांच्या निवडणुकीच्या तोंडावर शिवसेनेची ताकद वाढली आहे.
