आजकाल फसवणुकीचे अनेक धक्कदायक प्रकार घडत आहेत. परंतु आता एका सोनाराच्या चक्रावून सोडणार स्कॅम समोर आला आहे. एका ज्वेलर्सने अनेकांना गंडवल्याची माहिती समोर आली आहे. हा सोनार ग्राहकांचे लाखो रुपयांचे सोने आणि रोख रक्कम घेऊन पसार झाल्याची धक्कादायक घटना घडली. हि घटना पालघरच्या सातपाटी येथील आहे.
समोर आलेल्या माहितीनुसार , गेल्या 3 वर्षांपासून अनेक ग्राहकांनी दागिने घडवण्यासाठी तसेच सोने खरेदीसाठी संबंधित दुकानात पैसे आणि सोने जमा केले होते. मात्र, ग्राहकांना दागिने परत मिळत नसल्याने संशय निर्माण झाला होता.
सुमारे 8 ते 10 ग्राहकांनी काही महिन्यांपूर्वी दुकानात जाऊन चौकशी केली होती. त्यावेळी दुकान मालकाने लवकरच सर्वांचे दागिने परत देण्याचे आश्वासन दिले होते, त्यामुळे अनेकांनी पोलिसांत तक्रार केली नव्हती. मात्र, गेल्या आठवड्यात दुकान बंद आढळल्याने आणि मालक कुटुंबासह गायब झाल्याने नागरिकांनी संताप व्यक्त केला. या सोनाराचे नाव असलम शेख असून त्याच्या दुकानाचे नाव सलीमा असे आहे. कित्येकांना त्याने खऱ्या सोन्याच्या बदल्यात बनावट सोने दिल्याचे समोर आले आहे.
यानंतर सातपाटी सागरी पोलीस ठाण्यात तक्रार दाखल करण्यात आली. प्राथमिक माहितीनुसार, सुमारे 3 किलो सोने आणि मोठ्या प्रमाणात रोख रक्कम घेऊन फसवणूक करण्यात आल्याचा अंदाज व्यक्त केला जात आहे. पोलिसांनी संबंधित ज्वेलर्सच्या मुसक्या आवळल्या असून त्याच्याकडून मोठ्या प्रमाणात मुद्देमाल जप्त केला आहे.
