नाशिक : अपघाताचे सत्र सुरूच आहे. मेरी रासबिहारी लिंकरोडवर स्व. प्रमोद महाजन गार्डनजवळ दुचाकीवरून जाणाऱ्या महिलेचा पदर दुचाकीच्या मागील चाकात अडकल्याने महिला रस्त्यावर पडली.
याचवेळी पाठीमागून आलेल्या ट्रकच्या चाकाखाली सापडून या महिलेचा जागीच मृत्यू झाल्याची हृदयद्रावक घटना घडली. अपघातात एक जण जखमी झाला आहे.
याबाबत मिळालेल्या माहितीनुसार ,दिंडोरी रोडवरील रहिवासी मायलेक दुचाकीवरून जात होते. शुक्रवारी (दि. २४) रात्री साडे नऊ वाजेच्या सुमारास प्रमोद महाजन गार्डनजवळ पाठीमागे बसलेल्या महिलेचा दुचाकीच्या मागील चाकात साडीचा पदर अडकला व महिला रस्त्यावर कोसळली. त्याच दरम्यान पाठीमागून येणाऱ्या ट्रकने त्या महिलेला चिरडले. अंगावरून ट्रकचे चाक गेल्याने महिला जागीच ठार झाली तर तिचा मुलगा जखमी झाला.
अपघातात ठार व जखमी मायलेकांची नावे रात्री उशीरापर्यंत समजू शकली नव्हती. याबाबत रात्री उशिरापर्यंत पोलिस ठाण्यात गुन्हा दाखल करण्याचे काम सुरू होते.
