वडील हेच एक असतात जिथे मुलांना सुरक्षित वाटते. आपले वडील असताना जगता आपल्याला कशाचीच भीती नाही हा समज मुलांचा असतो. वडील आणि मुलांचं प्रेम आणि त्यांचं नातं हे प्रेमाचं काळजीच आणि मुलांचं सर्वस्व च वडील असतात. पण एका दारूच्या आहारी गेलेल्या पित्याने या नात्याला काळिमा लागेल असे दुष्कर्म केले आहे. बायकोने दारू प्यायला पैसे दिले नाहीत, म्हणून जन्म देणाऱ्या बापानेच दोन्ही मुलांना तापी नदीत फेकून त्यांची हत्या केल्याचा धक्कादायक प्रकार समोर आला आहे. धुळे जिल्ह्यातील थाळनेर गावात ही संतापजनक घटना घडली आहे. कार्तिक कोळी आणि चेतना कोळी असं मृत्यू झालेल्या दोन्ही भावा-बहिणींची नावं आहेत. कार्तिक हा अवघ्या 6 वर्षांचा तर चेतना ही 3 वर्षांची होती.
मिळालेल्या माहितीनुसार , थाळनेर गावातील भुईकोट किल्ल्याशेजारी असलेल्या तापी नदीच्या पात्रात दोन लहान मुलांचे मृतदेह गावकऱ्यांना तरंगताना आढळून आले. घटनेची माहिती मिळताच गावकऱ्यांनी लगेचच पोलिसांना बोलावलं आणि मृतदेह पाण्यातून बाहेर काढण्यात आले.
दारू पिण्यासाठी पैसे दिले नाहीत म्हणून पत्नीसोबत वाद झाल्यानंतर बापानेच दोन्ही मुलांना तापी नदीच्या पात्रात फेकल्याचं पोलीस तपासात समोर आलं आहे. याप्रकरणी पत्नी छायाबाई कोळी हिच्या फिर्यादीवरून थाळनेर पोलीस ठाण्यात हत्येचा गुन्हा दाखल करण्यात आला आहे. यानंतर थाळनेर पोलिसांनी आरोपी संजय कोळी याला अटक केली आहे. या घटनेमुळे थाळनेर गावात खळबळ उडाली असून, या नराधम बापाला फाशीची शिक्षा द्यावी, अशी मागणी केली जात आहे.
