नांदेड जिल्ह्यातील हदगाव तालुक्यात असलेल्या आष्टी गावाच्या शिवारात हळद शिजवताना प्रेशर कुकरचा भीषण स्फोट झाला असल्याची दुर्दैवी घटना घडली आहे. या अपघातात चार शेतकरी गंभीर जखमी झाल्याची धक्कादायक घटना घडली आहे.
हळद शिजवताना कुकरमध्ये जास्त दाब असल्याने हा अपघात घडल्याची माहिती मिळत आहे. हा स्फोट एवढा भयंकर होता की, कुकरचे अक्षरशः तुकडे तुकडे होऊन दूरवर अंतरावर जाऊन पडले.तब्बल 600 फूटांपर्यंत कुकरचे तुकडे उडून गेले. यात चार शेतकरी गंभीर जखमी आहेत. या जखमींवर नांदेडच्या शासकीय रुग्णालयात उपचार सुरु आहेत.सध्या सर्व जखमींवर उपचार सुरू असून, त्यांची प्रकृती स्थिर असल्याची माहिती डॉक्टरांनी दिली आहे.
दरम्यान, सध्या नांदेड कृषी उत्पन्न बाजार समितीत हळदीला सोन्याचा भाव आलाय, ज्यात हळद दहा हजार रुपये अशा विक्रमी दराने विक्री होत आहे. त्यामुळे शेतकरी वर्गात मात्र आनंदाचे वातावरण आहे. ग्रामीण भागात हळद काढणीस मोठा वेग आलाय. ज्यात हळद काढणी, शिजवणे, वाळवणे, ढोल करणे या कामांना गती आल्याचे पाहावयास मिळत आहे.
तर दुसरीकडे उन्हाचाही पारा देखील वाढला. त्यामुळे आतिउष्णतेमुळे विद्युत वाहक रोहित्राचा स्फोट होणे आणि हळद कुकरचा स्फोट होण्याच्या घटना होताना दिसत आहे.
