रितेश देशमुखच्या आगामी 'राजा शिवाजी' या चित्रपटाच्या सेटवरून एक धक्कादायक बातमी समोर आली आहे.शूटिंगदरम्यान, एक डान्सर कलाकार नदीत बुडाल्याची बातमी समोर येत आहे. या बातमीने एकच खळबळ उडाली असून शूटिंग तातडीने थांबवण्यात आलं आहे. "राजा शिवाजी" चित्रपटाचे शुटिंग सुरु असताना ही घटना घडल्याने सर्वांनाच मोठा धक्का बसला आहे.
संगम माहुली येथील कृष्णा नदीलगत असलेल्या ठिकाणी हा डान्सर कलाकार बुडाला आहे.घटनेनंतर काही वेळ सेटवर गोंधळाची स्थिती निर्माण झाली. रितेश देशमुख स्वतः काही वेळ नदीकाठी थांबून परिस्थितीचा आढावा घेत होता. दरम्यान , चित्रपटाच्या टीमने तात्काळ प्रशासनाला माहिती दिली आणि स्थानिक पोलीस व आपत्कालीन बचाव पथक घटनास्थळी दाखल झाले. मात्र संध्याकाळपर्यंत कोणताही ठोस परिणाम न मिळाल्यामुळे मोहिम तात्पुरती थांबवण्यात आली. पाण्याचा प्रवाह आणि अंधारामुळे अडचणी येत असल्याचे पथकाने सांगितले आहे. उद्या पुन्हा शोधमोहीम सुरू करण्यात येणार आहे. चित्रपटाच्या टीमकडून अद्याप अधिकृत प्रतिक्रिया आलेली नाही.
