नवीन नाशिक (भ्रमर प्रतिनिधी) :- तरुणीचा विश्वास संपादन करून ५५ वर्षीय विवाहित इसमाने ३६ वर्षीय तरुणीला प्रेमाच्या जाळ्यात अडकवून तिला लग्नाचे आमिष दाखवून तिला वेगवेगळ्या हॉटेलमध्ये नेऊन तिच्या इच्छेविरुद्ध ४ वर्षे लैंगिक अत्याचार केल्याची घटना घडली आहे. नंतर या इसमाने तिच्याशी लग्नास नकार दिल्याने त्याच्यासह त्याच्या कुटुंबाविरुद्ध गुन्हा दाखल करण्यात आला आहे.
याबाबत पोलिसांनी दिलेली माहिती अशी की, फिर्यादी तरुणी ही सिडको परिसरात रहाते. तिची आणि आरोपी विनोद कुचेरीया (वय 55) यांची फेसबुकवर ओळख झाली. याने सिडकोतील त्रिमूर्ती चौकात फिर्यादीच्या दुकानात जाऊन तिच्याशी ओळख निर्माण करुन तिचा विश्वास संपादन केला. तुझ्याशी मी दुसरे लग्न करेल अशी बतावणी केली.
त्यानंतर तिला लग्नाचे आमिष दाखवून लेखानगर येथील ग्रॅण्ड अश्विन हॉटेल, इंदिरानगर येथील साई साया हॉटेल, साईकिरण हॉटेल, पाथर्डी फाटा येथील हॉटेल सेवन हेवन, तसेच फिर्यादीच्या दुकानात नेऊन तिच्याशी शारिरीक संबंध प्रस्तापित केले. त्यासंबंधाचे त्याने व्हिडिओही काढले. ते व्हिडिओ व्हायरल करण्याची धमकी देऊन वेळोवेळी पिडीतेसोबत लैंगिक अत्याचार करत राहिला.
फिर्यादी तरुणीने आरोपी विनोद कुचेरीया याच्याकडे लग्नाबाबत विचारणा केली असता त्याने लग्नास नकार दिला. आपली फसवणूक झाल्याचे पिडीतेच्या लक्षात आले. दरम्यान, फिर्यादी तरुणी व आरोपी कुचेरीया यांच्या प्रेमसंबंधाची कुणकुण विनोद कुचेरीयाच्या 35 वर्षीय मुलीला लागली. त्यानंतर आरोपीच्या मुलीने पिडीत महिलेला शिवीगाळ केली. तसेच आरोपीच्या ७० वर्षीय आईने पिडीतेला फोन वरुन धमकी देत ‘विनोद पैसे वाला आहे, तु दुसरे लग्न करून टाक नाही तर तुला खूप महागात पडेल,’ अशी धमकी दिली.
हा प्रकार 14 ऑगस्ट 2021 ते 30 नोव्हेंबर 2025 या कालावधीत वेगवेगळ्या हॉटेलमध्ये घडला. याप्रकरणी पिडीतेने दिलेल्या फिर्यादीनुसार आरोपी विनोद कुचेरीया, त्याची मुलगी व त्याची आई या तिघांविरुद्ध गुन्हा दाखल करण्यात आला असून, पुढील तपास महिला सहाय्यक पोलीस निरीक्षक पलांडे करीत आहेत.
