महापालिका निवडणुकीपूर्वी मुंबईत मोठी घडामोड घडली आहे. मुंबई महापालिका निवडणुकीपूर्वी ठाकरे गट शिवसेनेला मोठा धक्का बसला आहे. तेजस्वी घोसाळकर यांनी ठाकरे गट शिवसेना पक्षाच्या सदस्यत्वाचा राजीनामा दिला आहे.
तेजस्वी घोसाळकर यांचे पती अभिषेक घोसाळकर यांचं एका दुर्देवी घटनेत निधन झालं होतं. त्याआधी वॉर्ड क्रमांक 1 मधून अभिषेक घोसाळकर 2012 ते 2017 पर्यंत नगरसेवक होते. त्यांच्यानंतर तेजस्वी घोसाळकर 2017 ते आतापर्यंत नगरसेविका होत्या. पण वार्ड क्रमांक 1 साठी आता ओबीसी (OBC) आरक्षण घोषित झालं आहे.
त्यामुळे तेजस्वी घोसाळकर वॉर्ड क्रमांक 7 किंवा 8 आणि संधी मिळाली तर वॉर्ड क्रमांक 2 मधूनही निवडणूक लढवू शकतात असं म्हटलं जात होत. पण त्याआधीच त्यांनी ठाकरे गटाला सोडचिठ्ठी दिली आहे. आज त्या भारतीय जनता पार्टीमध्ये प्रवेश करु शकतात.
ठाकरे गट शिवसेना सदस्यत्वाचा राजीनामा देत असताना तेजस्वी घोसाळकर यांनी एक भावनिक पोस्ट केली आहे. “आज आपल्याशी संवाद साधताना माझं मन प्रचंड उद्गिग्न झालं आहे. आयुष्यात असा क्षण कधी येईल आणि असे शब्द लिहावे लागतील, याची कल्पनाही मी कधी केली नव्हती. आज मन जड आहे…शब्द अपुरे पडत आहेत…पण तरीही हा संवाद आवश्यक आहे” असं तेजस्वी घोसाळकर यांनी लिहिलं आहे. “आज राजकारण करताना, जनतेसाठी काम करताना आणि माझ्या कुटुंबाची जबाबदारी पार पाडताना मला अपार अडचणींचा सामना करावा लागत आहे” असं तेजस्वी घोसाळकर यांनी पोस्टमध्ये लिहिलं आहे.
घोसाळकर कुटुंब हे ठाकरे कुटुंबाशी निष्ठावंत मानलं जातं. भाजपच्या मनीषा चौधरी आज दहीसर विधानसभेच्या आमदार आहेत. पण त्यांच्याआधी शिवसेना नेते विनोद घोसाळकर दहिसर विधानसभेचे आमदार होते. तेजस्वी घोसाळकर या त्यांच्या सूनबाई आहेत. विनोद घोसाळकर हे मुंबई उपनगरातील ठाकरे गटाचे एक मोठं नेते आहेत. मातोश्रीसोबत त्यांची विशेष जवळीक मानली जाते. एकनाथ शिंदे यांनी शिवसेनेत बंड पुकारल्यानंतरही विनोद घोसाळकर हे उद्धव ठाकरे यांच्यासोबतच राहिले. पण त्यांच्या सूनेने तेजस्वी घोसाळकर यांनी वेगळा मार्ग स्वीकारण्याचा निर्णय घेतला आहे.
